陳柏宇一家三口識歎租大屋窩心有諗頭抗拒套廁寧住細房

Oct 14 2020

廣告

香港地地少人多、樓價高企，想有自己地方又想住好啲，郁啲要有幾千萬身家至得，所以即使係搵錢能力相對較高嘅藝人明星，都唔係個個捨得買樓，認為租屋住化算啲。不過租屋都可以態度大不同，好似陳柏宇同老婆符曉薇年頭細屋搬大屋，由於計劃將來喺加拿大置業，所以選擇在港租樓暫住先，不過佢哋就比較有要求，新居髹過晒啲牆、訂造大部分傢俬、網上訂購精緻小玩意同擺設，就算租都要住得啱心水、似個家！

撰文、圖片：東方新地

陳柏宇被老婆爆怪癖

早前陳太符曉薇就拍片介紹新租住嘅九龍區豪宅，長達廿幾分鐘每間房每個角落每件傢俬陳設都詳細介紹原因來歷，house tour期間仲有兩歲囡囡 Abi 全程搞搞震，吵吵鬧鬧之間都爆咗好多男主人獨一無二嘅怪癖！

17年結婚、18年生女，婚後陳柏宇努力養家，老婆符曉薇都成為一線港媽KOL，就算係疫市，一樣有能力細屋搬大屋。

早前符曉薇就喺個人 YouTube channel 發布長達二十分鐘片段玩 house tour 介紹新屋，全程仲有兩歲 Abi 不停「 BaBa 」、「 MaMa 」亂入搞搞震！

四房兩廳設計大屋，符曉薇承認兩公婆曾經為大廳擺設爭拗過：「最後惟有聽陳生講，因為佢係出錢嗰個！」

門口巨型鞋櫃都係陳柏宇畫圖訂造，仲有玄關都加咗鏡面木邊令整體色 tone 更一致。

大廳髹咗灰綠好有格調，陳太唔少短片都喺自家大廳搞掂，屋企周圍都有靚背景。

話說陳家有四房二廳三個廁所，兩個套房前後四個露台，陳生有主人房唔住，揀咗間仲細過工人房淨係擺得落雙人床嘅細房嚟瞓，原因係「有套廁影響睡眠質素」，同埋「入房只可以瞓覺，唔想一個瞓緊覺、一個就起身整嘢嘈到另一半」喎！窩心又有諗頭，最緊要出大份錢嘅陳柏宇原來仲有啲設計天份，老婆梳妝枱、工人高架床仲有門口雜物櫃，都係陳生親自畫圖特別訂造，而每間房都有主題顏色，連工人房都髹咗姐姐最鍾意嘅粉紅色，呢啲咁好嘅僱主去邊度搵？仲有呀，雖然老公搵到錢，但老婆符曉薇都精打細算識慳錢，大方向大傢俬陳柏宇話事，小飾物櫃、囡囡房護墊就係陳太淘寶番嚟，呢啲咪配合得天衣無縫囉！

你估佢唔到，陳柏宇竟然嫌主人房有套廁影響睡眠質素，結果用咗超大主人房做衣帽間，除咗三個大衣櫃，陳太仲有專屬首飾櫃，同陳生設計訂造梳妝枱。

陳柏宇認為睡房只可以攞嚟瞓覺，所以兩公婆揀咗全屋最細嗰間房嚟瞓覺，真係細到只係擺得落一張雙人床。

陳太自爆以前少煮食因為廚房細，依家有個大廚房仲對住無敵靚景，每晚晚餐都係女主人親手炮製。

陳家主人房有兩個露台、BB 房有露台、仲有大廳有個超長形對住球場景嘅巨型露台，正 view 令人心曠神怡！

陳太喺大露台種咗唔少花草，仲擺埋枱凳可以睇住風景食早餐。

主人房以外最大間房留咗畀寶貝女 Abi 住，房間髹上粉紅色牆身，訂造埋公主床。

牆身一排咁特別嘅仙人掌保護墊，就係精打細算嘅陳太淘寶番嚟。

關鍵詞

讀者留言