直擊黃智賢孖美魔女愛妻玩狗B 西貢千萬愛巢曝光

Aug 27 2020

廣告

要數圈中癡心情長劍，黃智賢肯定數一數二，同太太識於微時，拍拖十四年，結婚十五年，雖然一齊走過將近三十年歲月，依然恩愛依舊體貼，唔使返電視城開工，黃智賢最常被影到就係陪太太拍拖行街，或者專程出城湊太座收工。

撰文、圖片：東方新地

黃智賢夫婦恩愛30年

兩公婆有共識唔生 B，不過就養咗三隻寶貝狗狗當正親生仔女一樣錫到燶，早前就見黃智賢拖住太太現身寵物店林立嘅勝利道玩吓狗 B 又睇吓用品，幫狗寶寶添置玩具零食之餘又順手二人世界拍吓拖。同黃智賢年紀相若，年近半百太太化行妝、身穿黑色緊身短裙，樣靚身材又惹火，原來都係美魔女嚟喎！

拍拖加結婚同行將近三十年，黃智賢與太太恩愛如昔，十指緊扣拖到實，黃太愛打扮又保養得宜，點睇都唔似年近半百。

兩公婆都係愛狗之人，間間舖頭都唔放過，見到貓狗輪流抱上身。

勝利道寵物店林立，玩吓BB 狗、睇吓新款玩具零食，話咁快打發咗半日時間。

為愛妻將村屋打造成度假屋

雖知生 B 責任重大，自稱性格唔啱做父母，但睇黃智賢同太太日日攬住三隻狗狗樂也融融其實又照顧得毛孩子妥妥貼貼，屋企冇小朋友雜物少又易打理，所以西貢大屋睇落都特別乾淨特別闊落！講起呢間屋，係黃智賢去年為太太豪擲895萬購入，現市值近千萬！由於兩夫婦崇尚簡約，加上老婆 Maggie 又係畫家，憑佢嘅藝術觸覺，將村屋打造成度假屋，令全屋充滿歐陸風情！

兩公婆同三隻狗狗住喺西貢獨立村屋，地方大夠晒三隻嘩鬼通屋走，全屋裝修走簡約風格，簡潔又光猛。

三隻寶貝喺黃家地位極高，上床瞓當然冇問題啦！

本身鍾意煮兩味嘅黃智賢閒時會拍片分享烹飪心得，呢個超大開放式廚房，黃智賢特別將佢命名為快樂廚房。

留意番巨型廚房背後仲有無敵海景，邊煮食邊歎 view，超爽！

著住樹燈喺大飯廳開爐燒烤，二人世界日子係過得疏肝啲又溫馨啲。

巨型客廳中央只簡單放置一個藍色電視櫃，空間感十足。

通往二樓梯間以橙色天花襯藍色門，牆壁放有太太嘅作品，充滿歐陸風情格調。

作為全職畫家，黃太嘅畫作布滿全屋每一個角落，一室充滿藝術色彩。

日前 Ben 為太太賀壽，訂製咗數十氣球布置，唔止屋內空間感十足，屋外個小花園更大得誇張。

當正三隻狗親生仔女一樣，家中當然唔少得有佢哋肖像嘅畫作啦。

行出露台可遠眺一望無際園林靚景，無得彈！

關鍵詞

讀者留言