43歲陳山聰宣布做老竇求子心切結婚4個月即造人成功

Feb 13 2020

廣告

曾經失戀失財失業仲一鋪清袋失埋形象，2019年絕對係陳山聰跌倒後再爬起身人生最豐收嘅一年，去年11月同拍拖多年嘅圈外女友Apple拉埋天窗，一直恨做爸爸嘅山聰日前終於如願以償，宣布老婆有喜！

撰文、圖片：東方新地

陳山聰老婆有喜緊張過中六合彩

山聰喺IG上載跪地錫錫老婆肚皮相，報喜留言：「我老婆情人節好少會畀驚喜我，不過今年佢送咗份我最想要又好鍾意嘅禮物，感恩上天賜畀我哋一粒小蒜頭。2020我又多一個身份『陳爸』，我會努力好好保護同照顧你同媽媽，希望你可以健康快樂成長。」山聰話平時老婆對佢照顧周到，今勻輪到佢煲湯畀老婆飲：「真係一鋪還番晒！」山聰笑言等待確認好消息一刻非常緊張：「真係緊張過中六合彩！」

去年11月結婚，二月就有好消息，證明山聰真係求子心切，一直不設防努力造人

宣布老婆有喜，陳山聰表現興奮：「真係忍得好辛苦，終於可以宣布。

爸爸順便大晒BB嘅超聲波照片。

同時宣布有喜嘅楊怡亦有喺IG留言恭喜山聰，並指大家可以組成 BB團！

終有代表作最感謝老婆支持

陳山聰終於擔正擁有第一個演藝代表作《金宵大廈》，又攞埋《萬千星輝最受歡迎拍檔大獎》，最大收穫就梗係娶到患難見真情嘅老婆何麗萍（Apple）啦！所以呢，山聰都真係好識感恩又珍惜呢個好老婆，豬年最後一個po發表感言話娶到個好老婆，鼠年第一po又係同老婆一齊拜年，恩愛到呢！

陪在身邊由人生最低谷爬番起身，老婆Apple被山聰視為人生最大收穫。豬年最後一po同鼠年第一 po都係同老婆晒恩愛，仲有佢最錫嘅姨甥女。

今時唔同往日，家陣勤力工作謙虛咗踏實咗，呢頭過完年，山聰已孖陳煒飛咗去加拿大登台搵錢。

名牌男唔逛名店變住家男

最緊要嗰樣，係山聰愛錫老婆唔係得把口，日前就見佢唔使開工，特登揸車過海出銅鑼灣接Apple收工，見早到咗仲有大把時間，仲走去家俬店睇吓有乜家居用品添置！新婚燕爾剛剛置頭新家，梗係好多日用品要睇要添置，以前渾身名牌只會逛名店，今日踎低起身睇吓碗碟又度吓窗簾尺吋，真係踏實咗大個仔咗，絕對係廿四孝老公潛力股！

太太從事美容生意，日前山聰唔使開工就專登過海去銅鑼灣接老婆收工。

預多咗時間，順便去睇碗碟又度窗簾，睇怕愛巢布置都係由陳山聰一手包辦。

「潮山聰」之稱嘅陳山聰向來對衣著講究，以前見佢都係行時裝名店多，婚後即變身住家男轉睇家居用品。

關鍵詞