44歲黃浩然做多功能老公 全程做好爸爸等老婆慢慢歎
無綫劇集《多功能老婆》終於播完，連慶功宴都搞完，一向將老婆同兩個仔擺喺第一位嘅黃浩然，嗱嗱聲安排放假，暫且回歸家庭做個 稱職老公同爸爸。
撰文：東方新地 圖片：東方新地、黃浩然IG
黃浩然做湊仔公 老婆做好市民
呢日就見到黃浩然做湊仔公，帶住8歲大仔Kayden 同6歲細仔Ransley現身銅鑼灣，行行吓停晒腳喎……原來太太莫家嘉正熱心向途人指緊路，梗係耐心啲畀太太做埋好市民先啦！
全程做好爸爸等老婆慢慢歎
做咗爸爸、有咗家庭，家庭日做啲乜？不外乎都係同啲小朋友放吓電、約朋友一家大細吹吓湊仔經。黃浩然一家當日就約咗友人家庭聚會，一行人去到餐廳坐低，黃浩然自動自覺坐喺兩個仔隔籬，先睇餐牌點餐，然後又照顧兩個仔食飯，完全唔使太太操心，黃太更落得清閒喺度篤手機，不知幾爽！一行人小朋友有小朋友玩、大朋友有大朋友交流，係就係有啲嘈，不過熱鬧都係一種幸福！
