姜濤生日|重溫初出道專訪 大談擇偶條件、成名之路:「單飛係最終目標」

星惜天下

廣告

4月30日係「姜濤誕」,姜糖忙於為偶像姜濤慶祝正式踏入22歲,這位萬人迷19歲憑《全民造星》冠軍出道、短短三年奪得「叱咤樂壇我最喜愛的男歌手」及「叱咤樂壇我最喜愛的歌曲大獎」 ,更被無綫視為強勁對手,不惜惡搞抽水,今次就重溫姜濤初出道的專訪,大談減肥原因、入行後的心態,以及擇偶條件!

文:1115期《東方新地》鄭紹康@星惜天下

當說到處男話題,工作人員立即擋駕,而姜濤則歎謂:「我幾時可以擺脫呢個話題?」

當說到處男話題,工作人員立即擋駕,而姜濤則歎謂:「我幾時可以擺脫呢個話題?」

減肥連瞓覺都餓醒

鄭:姜濤呢個名好特別,有無特別意思?

姜:我阿爸阿媽問相士我改咩名好,相士好似話我命中缺水,但我本身唔係好鍾意呢個名,由細到大都諗住改名,我覺得大部分人嘅名都係三個字,同埋用廣東話去讀姜濤好似好奇怪,我都有問公司可唔可以改名,但公司話姜濤呢個名夠特別呀!

鄭:相士有無講你命格適合做咩行業?會唔會大紅大紫?

姜:好似話改咗有水嘅名,財運同任何方面都會好順利,但我阿爸阿媽直到幾年前都覺得好似唔係好work,覺得我讀書、體育咩都好似唔係好得,覺得唔係幾準。

鄭:19歲成名,係你預計之中定太早?

姜:香港嚟講應該算比較細個,但我睇開韓國、日本、大陸其實偏向愈嚟愈後生,我唔覺得太早,反而覺得趁依家呢個年紀做多啲嘢。

鄭:幾時發覺鍾意做呢行?

姜:小學仲係肥仔嘅時候,第一次學校有表演嘉賓嚟表演,又見到同學都有上台表演,自己都好想上去,但我無同任何人講過呢件事。自己心入面一直喺度諗,上網睇,睇睇吓睇到有個人叫小豬(羅志祥)原來佢係肥仔變到咁靚仔,好鍾意佢,默默地有種子喺個心入面,慢慢就向呢個方向前進。

姜濤原爲200磅肥仔, 發育期開始減肥, 幸而沒影響身高。
姜濤原爲200磅肥仔, 發育期開始減肥, 幸而沒影響身高。

鄭:有無不斷學唱歌、跳舞?

姜:嗰時唯一目標係變瘦先,因為我覺得我如果唔瘦啲,我驚畀人笑,好似無自信去唱歌跳舞。

鄭:純粹因為咁?唔關追女仔事?

姜:嗰個係刺激我嘅導火線,我好想變瘦,但無動力,覺得都係食嘢開心啲,但自從畀一個女仔刺激完,真係唔得嘞,仲有中學時期人緣唔係太好,所有嘢加埋到嗰個timing就去做。

鄭:有無再見番嗰啲女仔?有無覺得佢哋走寶?

姜:無,我覺得所有遇到嘅人,都係值得感激嘅人。

鄭:減肥過程係咪好痛苦?有無唔開心、好躁?

姜:我用一個暑假由好肥變到好瘦,係好痛苦,因為用錯方法,同埋細個唔識點樣正確地減肥,將自己發育期間最應該有營養嘅時候,日日唔食嘢去做運動,搞到身體好差。

鄭:忍口難唔難?

姜:減肥最難應該都係忍口,因為做運動做到攰忍一忍就OK,但食嘢,尤其是肥仔對食物嗰種渴求應該更加大,會廿四小時係咁諗食物,連瞓覺都會餓醒。

姜濤由參賽到奪冠均備受注目,更是各大品牌的代言寵兒。
姜濤由參賽到奪冠均備受注目,更是各大品牌的代言寵兒 ⋯⋯
姜濤:單飛
Etude House代言
姜濤:單飛
姜濤拍廣告。

參加《造星》 只因「免報名費」

鄭:據聞你細個已經不停練習台風、造型、照鏡、扮靚……

姜:細個肥仔嘅時候好唔姿整,喺學校畀人話過:「你個口好臭!」到依家隨身都帶住香口膠,自從畀一個女仔hurt完,嗰時開始好注重自己嘅儀態,阿媽都開始教我點去減肥、著衫。

鄭:你想入行,屋企有無反對?

姜:一開始,佢哋無當係一回事,佢哋覺得都係無可能嘅事,佢哋純粹覺得我好鍾意明星,到我默默地去比賽,同佢哋講我返大陸比賽,入咗圍,佢哋先覺得原來你認真嘅!佢哋都好支持嘅,佢哋都覺得既然你唔係讀書嘅材料,就做你自己鍾意嘅嘢。

鄭:點解當初喺內地參加比賽?抑或你想喺內地發展?

姜:嗰時上網搵唔使錢參加嘅比賽,好多比賽都要畀報名費,我唔想畀,見到《快樂男聲2017》唔使錢,入咗又包食包住,就去咗。我完全無諗過可以入到咁後(晉身30強)。

鄭:你參加《全民造星》,最初99個參賽者嘅時候,係咪經已好有信心?

姜:參加《全民造星》都係因為唔使畀錢參賽,我無覺得好有信心,純粹第二次參加比賽,想睇吓呢一年進步咗幾多,因為嗰年我都有去學過跳舞,睇吓可以行得幾遠。

鄭:你一出就係大熱門!

姜:我無諗過,99強個表演之後,見大家都鍾意我嘅表演,之後嘅表演再做調整。

鄭:你都做晒資料搜集!

姜:一直以嚟,我都好鍾意睇選秀節目,所以我會比較了解選秀節目所需求嘅嘢。

鄭:身為大熱門,你好大壓力定好輕鬆?

姜:比賽嘅時候,淨係好專心去諗下一隻歌點樣去做,我諗專心做好嘅表演都會好睇,好睇自然會吸引多啲人。

鄭:贏咗嗰一百萬,依家喺邊?

姜:九成喺阿媽度,幫我儲住。

鄭:公司對你都好多安排,綜藝、電影、唱歌,你最鍾意做咩?

姜:我第一目標當然係做香港嘅唱作歌手,第二係演戲,其實總之關於呢一行嘅嘢,我無咩係唔鍾意,因為我好鍾意小豬講嘅:「喺呢行,做咩要似咩!」做演員就要似一個演員,當做齊晒呢啲嘢,先至唔容易畀人淘汰。

鄭:收入有無暴漲?

姜:我好感激依家搵到一份自己鍾意、又養活到自己嘅工作,因為我覺得喺香港,要養活到自己已經係好難嘅事,好幸運暫時有呢個能力。

姜濤:單飛
《全民造星》奪冠赢得的一百萬獎金,絕大部分交由母親代爲管理, 笑言:「或者好似利是錢咁,話幫我儲起,儲吓儲吓唔知去咗邊。」

唔介意犧牲私隱

鄭:私隱有無改變?

姜:有,私隱係最大嘅改變。

鄭:你點調節?

姜:其實我未參加比賽之前,我已經成日幻想做明星會點答呢啲問題,因為我成日睇啲明星答。我覺得應該要好多謝有呢啲無私隱嘅空間,如果做藝人無呢啲嘢,其實同一個素人係無分別。因為做呢一行就會有呢啲嘢,即係做廚師,隻手一定會燙傷,作為一個藝人,係需要付出一啲私隱度嘅犧牲,even畀人誤解、畀人喺網上評論,我好少會因為呢啲事嬲。

鄭:有無啲fans好猖狂?

姜:一定有啲fans係比較激進,例如好迫嘅時候,係咁捉住我唔放……

鄭:即係抽水啦!呢啲情況你會點做?

姜:通常我都唔會點,太混亂喇嘛,只要大家唔好受傷就OK!

「單飛係每一個人嘅最終目標」

鄭:有fans跟過你返屋企,你反感?

姜:初頭我覺得無乜嘢,我畀人跟其實都好正常,但後尾驚影響到屋企人,因為我屋企人唔係好想喺大眾面前,就同fans講盡量唔好嘞!

鄭:一隊咁多個人,總有妒忌,點解佢企我前面、點解佢件衫靚過我?你哋點調節?

姜:公司每樣嘢都安排得好恰當,唱歌、跳舞好嘅,梗係畀佢哋先,每一part都會有人做佢擅長嘅嘢,所以唔存在妒忌。

鄭:單飛定團隊發展,對你嚟講係咪重點?

姜:我覺得,作為一個藝人,其實都係想畀更加多嘅人見到自己,單飛係每一個人嘅最終目標,我又唔會話想快啲單飛,我諗時機到自然就會有呢個機會。

鄭:你有個混血表妹,都好多人關注,佢有無打算入行?

姜:哈哈,佢係鍾意入呢行嘅,佢好鍾意show off自己,但各方面我哋都覺得佢應該以讀書為重,佢自己都係,同埋佢讀書都OK。

姜濤:邊個唔想拍拖

鄭:無拍過拖?

姜:以前有同一個女仔試過好似我以為係拍拖嘅嘢,點知其實係畀人玩!

鄭:你鍾意咩類型嘅女仔?

姜:我理想中係無機心,呢個係第一重點,外表梗係得意啲啦,我鍾意得意啲嘅女仔。其實我唔會將呢啲當係標準,因為我知當遇到鍾意嘅人,可能會同我嘅標準完全唔一樣。

鄭:之前影到你同網紅Anjan舉止親密!

姜:其實嗰張相係因為喺巴士站遇到佢,嗰個女仔係之前拍戲嘅時候有傾過兩句,唔係話特別熟,當時無呢個意識,因為我好少同女仔出街,又覺得無做啲咩,純粹搭巴士。

鄭:你想唔想拍拖?抑或你覺得依家拍拖係無可能?

姜:我諗我呢個年紀嘅男仔,其實都想拍拖,拍拖邊個唔想?但拍拖一嚟一定驚影響自己,二嚟驚影響人哋,因為你唔會想個女仔萬一畀人發現,佢以後就畀人話係姜濤嘅前度,我覺得呢個係對女仔唔好嘅傷害,所以都係三思而後行。無可否認一定想拍拖,但會考慮到好多嘢,依家事業緊要過呢啲。

Ian 、Anson Lo表示「歌酬平分都夠使」

另外兩名Mirror隊友Anson Lo盧瀚霆)與Ian(陳卓賢),亦談到收入及對未來發展的期許。

鄭:入行之前做咩?

A:我教跳舞為主。

鄭:依家收入對比之前教跳舞,有無多咗?

A:都差唔多。

鄭:你入行屋企人有無反對?

A:反對就無,但有擔心,擔心生計同埋行得唔遠。我之前揀做跳舞呢條路,佢哋已經反對過一次,所以今次我再揀一條佢哋認為再危險啲嘅路,危險嘅意思係會唔會再唔穩定啲、變數再多啲。

鄭:對未來有咩展望?

A:想我哋呢團更加多人識,無睇《全民造星》嘅觀眾都可以因為我哋嘅表演或者音樂,而更加鍾意我哋。

鄭:《全民造星》即將開第二輯,有無擔心被遺忘或者分薄資源?

A:唔會,反而好期待新血,可以同我哋crossover。

鄭:Ian入行之前做咩?

I:學生。

鄭:入行後,收入同心態有咩轉變?

I:收入一定多咗,因為我做學生無收入。心境上覺得幸運,因為我唔係好細個就開始玩音樂、唱歌,都係近兩、三年先發掘唱歌呢個興趣,好感恩一畢業就可以做到自己鍾意做嘅嘢,身邊有一班兄弟一齊行,個開始都幾順利,會覺得幾幸運。

鄭:你覺得姜濤攞冠軍係咪實至名歸?

I:我覺得係嘅,我攞第二我都唔會覺得點解唔係我攞第一,我完全唔會咁諗,佢攞冠軍一定有佢嘅原因,可能大家會覺得一個19歲嘅後生仔,畀咗個冠軍同畀咗一百萬佢,可能會對佢嘅成長唔好,但我覺得姜濤自己係有足夠成熟嘅思想,因為佢係好有計劃嘅人,佢知道做一個藝人係要點行,佢對自己人生係好有規劃。

鄭:歌酬係咪12個成員平分?

A:係!

鄭:會唔會唔夠使?

A:唔會,每個成員各自有底薪同埋每個成員各自有自己唔同嘅工作,有拍廣告、有拍drama,所以都唔會有唔夠食嘅情況。

姜濤:單飛
Ian : 「好感恩一畢業就可以做到自己鍾意做嘅嘢。」
問到Ian成員間有否拗撬:「 12個男人,有自己獨立思想,成日都有不同慨意見,摩擦唔多唔少會有,但去到最後都會大家坐低傾,唔會有冷戰、小圈子。」
問到Ian成員間有否拗撬:「 12個男人,有自己獨立思想,成日都有不同慨意見,摩擦唔多唔少會有,但去到最後都會大家坐低傾,唔會有冷戰、小圈子。」

後記:娛圈的將來

看得出姜濤做訪問時是有些緊張的,畢竟受訪時還是19歲小伙子,其實我也擔心會有代溝這回事,幸好過程非常順利如傾偈那樣無所不談,眼前三位就是代表了香港娛樂圈的將來,他們就是有全民做出來的星級引力,很想把自己的經歷傳授給他們,願他們星途燦爛,大放光芒!

姜濤:單飛

●撰文:劉倬延
●攝影:Jacy
●設計:Gary
●髮型:King Lee@Private I Salon
●化妝:Jennifer Chan & Giann Cheung@Annie G Chan Makeup Centre
●服裝提供:Boss(姜濤&Ian),MCM(Anson Lo

關鍵詞
姜濤