《我瞞結婚了》大結局洪永城黃浩然齊娶翠如

小明小博舉行婚禮

Lucas (黃浩然飾) 自知時日無多，所以同Tony (洪永城飾)及Janet (黃翠如飾)四圍去玩，又露營又三人踩單車。但佢指自己仲有一個心願未了，就係想舉行婚禮！

婚禮上眾人語帶感觸地恭喜Lucas，而Tony亦一臉不情願咁出席，咁大家好自然認為Lucas係同Janet結婚啦。

不過TVB劇集最喜歡俾驚喜觀眾，當Janet着到靚一靚現身準備讀誓詞，大家先知呢個婚禮係屬於「小明」同「小博」！即係兩隻蜥蜴……

當蜥蜴宣誓儀式完成後，眾人先發覺Lucas竟然唔見咗，原來佢一早計劃要遠走高飛，去做自己愛做的事。Janet得知Lucas打算去新加坡，隨即甩開Tony隻手，不顧一切去搵Lucas…… 到底最後會點？

之後就係大家最期待的「N年後」啦！鏡頭一轉去到阿Kay (傅嘉莉飾) 的潛水店，阿Kay抱住一個小朋友，而Tony就好落力咁sell潛水班俾客人，活像一對合力經營生意的甜蜜夫妻！

不過編劇原來又係故意俾錯覺大家，阿Kay抱住的小朋友其實係妹妹同妹夫個仔，佢幫手照顧住先！順帶一提，李國麟同何君誠仲交換咗髮型……

咁到底Janet係揀Lucas定Tony呢？去到大結局尾段的水上婚禮中，驚變野獸造型的Lucas拖住一個紅色短髮藍眼睛的「Janet」出現，但Tony拖住的新娘就係原裝版Janet，究竟大台編劇今次想玩咩啊！

原來是咁的，當初Janet真係去咗新加坡陪Lucas醫病，點知Lucas喺醫院就遇到一位同Janet一模一樣的護士「小霞」(由黃翠如戴假髮、講普通話分飾…)，兩人更一見鍾情！見到Lucas覓得真愛，Janet就可以返去Tony度啦！

不過Janet又唔係即刻返香港喎，就話要去世界各地遊歷一番，而Tony又唔知點解唔使返工周圍去旅行，於是兩人又上演一幕幕《走過浮華大地》… 之後兩人更在出事故的飛機上重遇，重現第一集的情景。

又係飛機事故，又係半空定格。

一套劇出現兩次呢個場面，唔通係想向《Matrix》致敬？

之後再回到水底婚禮，兩對新人齊齊在水底宣誓及交換戒指，由《我瞞結婚了》變「我們結婚了」！有觀眾認為翠如BB同洪永城始終應該係一對，亦有唔少人覺得黃浩然好得多，好想睇佢同翠如BB終成眷屬。相信呢個大團圓結局，應該可以滿足晒唔同觀眾的意願… 好似係。