中年好聲音3｜張崇德質疑評分不公 4大重點指TVB偏袒趙浚承 王鄭浚仁被低估

張崇德力讚王鄭浚仁被低估

張崇德喺影片中逐一分析參賽者表現，例如話黃博唱腔唔夠流暢、陳芷盈刻意用少女聲演繹《戀愛預告》、李金凱聲音真摯且專注度最高，具講故事能力。佢同網民意見一致，認為王鄭浚仁嘅88分過低：「難道技巧成為缺點呢？技巧太好會係缺點咩？音域太闊會係缺點咩？唔應該係嘅。我睇電視嘅時候見到分數轉緊，轉到得八字頭嘅時候我個心真係離一離啊，有乜可能呀？結果真係88分，仲低過陳芷盈1分，更加冇可能，呢個係我自己睇法。呢一隻歌嘅難度係高過《戀愛預告》好多好多。」佢激讚王鄭浚仁清唱開場已感情充沛且穩定，質疑評判低分原因。

趙浚承高分惹議 結婚片段被指影響公平

對於MVP趙浚承獲98分，張崇德認為佢表現未算突出，話：「即使副歌情緒到位，但技巧及音色處理稍遜，更有種怪怪哋嘅『鴨仔聲』，有機會係口型影響到發聲及收放。」佢仲提到，TVB喺趙浚承表演時播放同老婆嘅結婚片段，影響公平性：「如果你話每個參賽者，8位都做同樣嘅嘢，咁就冇問題喎，大家都用一啲片段，佢唱情歌嘅時候去配合，但係唔係㗎嘛，淨係得佢喎，點解我要講呢樣嘢呢？就算你唔使理佢唱得好唔好，你有咁嘅畫面出嚟都已經影響咗。」

佢認為呢舉動唔單對其他選手不公，亦可能令觀眾對趙浚承產生負面觀感：「就係，嘩，點解得你有呢樣嘢？係咪用呢樣嘢去情緒綁架咗評判呀？」

評判過分注重感情 張崇德提公平評分準則

張崇德提出一套客觀評分準則，涵蓋音準拍子、聲線氣息、技巧難度、感情投入同舞台表現，認為可減低主觀因素，做到一視同仁。佢批評當集以「情歌」為主題，評判過分側重感情，忽略技巧，點名王馨平話佢要求選手「要感動到佢」：「感動到佢嘅就係高分，呢個係佢自己着重咗感情，感情差唔多係最緊要，咁係咪走音都唔緊要，如果感動到你？」佢又提到肥媽喺李金凱表演時因懷念張國榮而落淚：「佢話佢令佢諗起哥哥，咁呢個就係太過情緒化囉，佢將自己嘅投入、懷念張國榮，擺咗喺個評分度。」

評分標準欠一致 張崇德籲感性理性並重

張崇德仲質疑評判分數缺乏區分度，例如王馨平同海兒畀趙浚承、李金凱同劉洋各20分：「王馨平，劉洋佢畀20分，金凱佢又畀20分，趙浚承佢又畀20分，咁我會問嘅問題就係，呢三位佢分唔分辨到邊個唱得好啲？同樣，海兒畀金凱嘅《今生今世》同趙浚承嘅分數係一樣，係20分，咁又分唔分辨到邊個高啲邊個低啲呢？」

佢強調評分應公平，感性同理性並存：「無論個歌聲令你有幾感動都好，你仍然要理性地去畀返啲分數，因為音準、拍子、音域都係一啶好客觀嘅準則嚟，而感覺係主觀，感覺可以好主觀㖭，可能全場得你一個喊都得，但係音準拍子嗰啲就冇喇，唔係你話冇走音就冇走音，唔係係咁樣。」佢嘅分析同建議為節目公平性問題拋出反思。

網友紛紛表示：「難得張崇德老師敢仗義執言，見到世事不公，肯持平！」有人認為佢句句公道，並質疑節目評分背後或有「劇本」，亦有網民讚賞張崇德嘅專業分析，話：「我覺得佢做評審幾好幾均真，起碼聽落句句公平公正。」唔少人認同佢嘅觀點，特別提到王鄭浚仁喺準決賽僅獲88分過低。