任達華琦琦13歲囡囡任晴佳 遺傳最強DNA 仲有一班長腿星二代！
雖然好多人覺得唔啱聽，不過現實就係咁殘酷，今時今日養兒育女唔止要贏在起跑線，正所謂基因決定一切，娛樂圈就有一班明星名模第二代深得父母遺傳，講緊嘅係任達華同琦琦嘅13歲囡囡，人仔細細已經九頭身、長腿、仙氣十足又有巨星氣場，未出世已經注定手長腳長高人一等，點止贏在起跑線，簡直係贏在射精前！
撰文：東方新地｜圖片：新傳媒圖片庫、琦琦IG
任達華琦琦囡囡 有43吋長腿
話說任達華同琦琦個獨女任晴佳今個母親節處女登場擔任首飾品牌模特兒，仲跟住媽咪一齊去到鋪頭揀母親節禮物。13歲女身高已經超過5呎7吋，眼大鼻高、樣子甜美，隨意一身白T、熱褲平底鞋，又pure又true。五官完全集合父母優良DNA，不過一對又直又長的43吋長腿，更加搶晒鏡！
年紀細寧推job
今次就話係客串玩票性質做一次暑期工model，其實天生咁嘅條件又有影帝爸爸同超模媽媽教路，唔行天橋唔做幕前，真係好浪費，華哥講到明代女推咗唔少job，當中仲包括有真人騷㖭，中港台都𥄫住呢位長腿星二代，雖然親手推咗唔少錢走，不過華哥話一啲都唔會手軟，全因為囡囡仲細，暫時唔考慮住咁話呀！大家死咗條心等多幾年先啦！
長腿星二代
李嘉慧大女Valerie 高人一等
份屬琦琦同行、九十年代又係香港超模的李嘉慧婚後一生就係三個女，大女Valerie又係深得媽媽真傳，12歲已經腳長長高人一等，五官亦生得甜美。
甄子丹大女Jasmine 間尺腳
唔係只得名模至基因強勁，宇宙最強甄子丹同太太汪詩詩個14歲大女Jasmine都生得高䠷，還有一對筆直長腿。
陳奕迅女康堤高過媽咪
不得不提，陳奕迅同徐濠縈愛女陳康堤13歲女已經高過媽咪，氣質出眾還有時裝觸覺，絕對又係遺傳基因作崇。康堤著住同款風乾濕褸，好似孖妹，身形比例比阿媽更優勝。
