永遠的學生情人｜46歲劉小慧係咪食咗防腐劑？

撰文：東方新地｜圖片：新傳媒圖片庫、劉小慧FB、蘇志威FB、LUXE Tuxedo fb

劉小慧 連買兩轉餸

早前人母劉小慧又好知掟去到九龍城街市大舉掃靚菜同靚肉，明明有個工人姐姐幫手，都係最信得過自己，親自行完一轉、買齊最新鮮最靚嘅餸再自己運上車。九龍城街市出名啲嘢又靚又平，小慧買完兩大袋搬上車竟然未夠喉，騰空兩隻手返入去街市再搏殺過，唔通一次過入定一個星期貨？

46歲劉小慧眨吓眼大女都已經19歲，依然白滑身材又fit，帶住cutie帽個樣真係仲有幾分學生情人情懷。

呢個阿媽一睇就知做慣做熟唔會依賴外傭，一個人行完一轉買咗四大袋瓜菜，行到上車至交畀工人姐姐放妥。

原來買完四大袋都未夠喉，小慧放低啲餸又再返轉頭買多轉。

由天光行到天黑，買完瓜菜魚肉再去埋藥房，一個星期一家四口食物同日用品一次過補充晒。

睇番劉小慧當年出道嘅91年推出的首張大碟封套，對比依家個樣，係咪冇乜點變先？！

當年有「學生情人」之稱的劉小慧，憑清純可愛的形象風靡萬千少男，佢跟草蜢成員蘇志威在幕前由工作認識到結婚，蘇志威現時依然活躍於娛樂圈，小慧則成為全職媽媽，以照顧兩個女兒君蕎及靖珺為己任。

大女依家已經19歲啦，早前蘇志威愛駒「駿王」跑第一，一家四口仲一齊去拉頭馬。

仲有一班美魔女，包括湯寶如、羅敏莊、陳伶俐、周慧敏同黎瑞恩，全部年過四十，但個樣仍然好似食咗防腐劑一樣！

劉小慧 唔揀國際學校

不少藝人都會選擇讓子女入讀國際學校，但劉小慧則不然，佢同意讀國際學校無咁辛苦，不過都決定讓女兒在傳統名校讀書，因為想女兒學好中文，熟悉中國文化；而且令佢哋從小習慣承受壓力，對將來在社會工作、或是待人處事都有幫助。

小慧以前都自認係個「怪獸家長」，會緊張分數而強逼女兒學習，要佢哋上唔同補習班谷成績。不過漸漸都會給予女兒較大自由度，安排佢哋上音樂、戲劇等興趣班，發展讀書以外的潛能，不再執着於分數。所以話小慧開始由虎媽變羊媽！

索女初長成！劉小慧大女學花式溜冰

蘇志威同劉小慧大女Yumi今年19歲大，已經亭亭玉立，仲識玩花式溜冰！早前小編就見佢一個人到又一城學溜冰，佢阿媽劉小慧之前接受訪問時透露Yumi熱愛溜冰，呢日見佢都好虛心請教溜冰導師，雖然練習期間跌過幾次，但Yumi都冇氣餒起身再嘗試，經導師指點後好快就溜得有板有眼！

Yumi學花式溜冰，雖然初上場曾跣到一仆一碌，不過Yumi愈跌愈勇， 好快已經溜得有板有眼。

Yumi每做完幾個動作都會虛心請教佢嘅溜冰導師，難怪進步神速。