劉德華獲浸大頒博士後首「開咪」跨越30年情誼力撐《我芝訂》

剛獲香港浸會大學頒授榮譽文學博士學位的劉德華（華仔），近日接受新城電台元老級主持陳小芝、啤梨（葉文輝）及懷鈺訪問。三人昔日一起主持《我芝訂》，相識數十載，今次27年後再度合體，在新城知訊台復刻經典節目《我芝訂》。眾人開口第一句就恭喜「劉博士」，華仔亦祝賀小芝、懷鈺復出，似老友敘舊多過做訪問。

華仔小芝跨越30年的情誼 力撐好朋友！

華仔笑言認識小芝幾十年，「數十隻手指都唔夠用」，自己當年仲揸車返工，朝早一路聽小芝節目，一路去開工，點知深夜「收廠」都仲聽到對方把聲。小芝自詡係香港廣播史上「唯一連續做12個鐘節目，而俾劉德華聽到嘅人」，華仔聽完即場大笑，盡顯跨越30年的情誼。

啤梨大爆做過華仔「張凳」

啤梨則親述1994年紅館演唱會的往事。當年佢只係chorus dancer，未夠資格做main，但就做過華仔「張凳」。啤梨：「我扮凳又升又降，等你兜一個圈去到我嗰個位停一停。」至於有冇被華仔坐過，就場場唔同，要睇下當日效果。華仔表示：「你要見到佢核心力有喇，我先夠膽坐。」小芝、懷鈺即場問華仔：「坐得舒唔舒服？」華仔笑住答：「我都係詐詐諦坐！」

懷鈺重拾當初緊張之情

三人齊聲承認自己都是華仔粉絲，懷鈺入行初期震住同劉生「扑咪」，華仔驚訝懷鈺到而家都仲係「緊張的忠粉」。懷鈺同小芝笑住叫華仔睇吓他們的打扮，原來27年前（1999年）三人已經以華Dee牛仔褸造型影造型照，啤梨仲話：「其實我哋好似一家人咁，亦都係你嘅粉絲，我哋追你每一首歌，到喺電台播你嘅歌，而家可以坐你隔籬。」

講到新歌，華仔輕輕透露可能出新歌，即時被三人包圍催促。小芝復出做番DJ，即場話終於可以狂播，仲提議一出碟就訂首播、book簽名，甚至再搞一次「劉德華日」— 全日所有節目都係華仔，所有歌都係華仔，好似當年試過嘅12個鐘專場一樣。華仔聽完笑住答應：「咁就靠你哋啦！」