區永權遭惡鄰4度高空擲物滋擾 網民提議向《東張》報料

區永權遭惡鄰4度高空擲物滋擾超過一年

《東張西望》主持區永權遇惡鄰居高空擲物，已不只一次嬲到要在社交網上分享事件，對上一次他收到了的「天降禮物」是一支明顯彎曲變了形的吸塵機吸棍，更疑似導致陽台邊出現一個大凹位，他之前更收過例如：煙頭、紙巾、螺絲、垃圾等等。事件已發生超過一年，日前（05/23）他再在社交網怒斥又收到「天降禮物」，今次是為數超過十粒的玻璃碎，體積大小及數量足以致命，但區永權唯有自我安慰，幸好無任何人受傷，他亦告誡鄰居要好自為之，事件已報案處理。

樓上鄰居又高空擲物，今次估吓係乜？

開估：係玻璃碎！仲唔止一粒，係為數超過10粒嘅玻璃碎，從天而降，降落喺我屋企個露台！其實高空擲物，對於我家嚟講，都已經唔係新鮮事。但係充滿殺傷力個玻璃碎，都真係第一次！唯一能夠自我安慰嘅，係今次都無造成任何人受傷！無論你係有心？定係無意？請好自為之！我已經報咗警！

區永權：明明好嬲，但又好好笑

他早前都曾經拍片樓上擲下工業用的索帶，當時他發文表示明白裝修好拆棚需要多方面兼顧，但最重要是安全至上，更提及已經有管理員向對方溫馨提示，但對方態度囂張話：「咁拆棚係咁㗎啦！」，區永權續說：「明明好嬲，但又好好笑！結果，你拆棚，我善後！幫你執晒所有首尾囉。」他只有感到相當無奈。

前主播林小珍連同網民紛紛提議向《東張西望》投訴

在區永權分享事件後，不少網民紛紛留言提議他向自己主持的節目《東張西望》投訴，連好友前財經主播林小珍和TVB藝人林秀怡都留言支持：「報東張」、「搵東張啦」、「東張西望幫到你、叫埋一蚊Joe採訪」，更有網民提議他可以自己在節目中報導事件：「可以報東張，自己訪問返自己」。