卓韻芝

卓韻芝結婚 鄭秀文 蔡卓妍 梁詠琪出動陪嫁 齊齊變喊包

最新娛聞

廣告

39歲才女卓韻芝同34歲從事電影美術嘅「閃電俠」梁子賢於上星期六結婚,星級好姊妹鄭秀文、蔡卓妍及梁詠琪等出動陪嫁擔任姊妹團,Sammi話整個婚禮過程既開心又感動:「喊死人!」

撰文:東方新地|圖片:卓韻芝IG鄭秀文IG蔡卓妍IG

卓韻芝婆婆好開心

婚禮當日早上,卓韻芝穿裙褂出嫁,並按傳統俗習禮過大禮,話說當新郎及兄弟團殺到時,阿芝婆婆好開心掛住同孫女婿傾偈,竟忘記叫孫女阿芝出場,要阿姨在旁提醒,十分搞笑。

向俞琤敬茶

之後卓韻芝同老公向最愛至親婆婆跪地斟茶,其實自從阿芝母親離世後,兩婆孫相依為命,感情深厚,孝順嘅阿芝亦表明婚後會與婆婆同住。而卓韻芝伯樂俞琤亦有接受一對新人敬茶,見俞琤當日笑到見牙唔見眼,就知佢非常開心。

Sammi喊不停

晚上婚宴喺中環外國記者會舉行,場外雖然有颱風「山竹」來襲,但場內氣氛依然溫馨熱鬧,到賀嘉賓有田蕊妮、蔡一智、黃耀明、徐天佑、導演許鞍華及C AllStar陳健安等等。粉紅姊妹團鄭秀文、蔡卓妍及梁詠琪開心陪嫁,Sammi喺IG拍片話:「好開心、好感動,喊死人!」跟住阿芝即刻話:「係呀,我一開始講嘢佢已經喺度喊,我心諗你唔好整喊我啦,佢喊我又好想喊。」之後,Sammi又同阿Sa、Gigi拍片祝福一對新人。

第一次叫老公

期間,卓韻芝更拖埋老公接受傳媒訪問,阿芝表示︰「多謝大家打風都嚟,我仲上網check,山竹又名『夫妻果』,相信個風都會畀我同朋友聚會先,今日賓客有近200人。」提到婚禮主題,佢就話︰「我老公……我咁大個女都係第一次咁樣叫人,我老公設計張帖係綠色,因為love is green,綠色係和平、環保同舒服。」

緊緻系姊妹

卓韻芝坦言喺台上好緊張︰「我上到台即刻喊,個腦一片空白,老公都好緊張,佢平時份人好低調。我記得多謝咗婆婆同俞琤,因為婆婆係證婚人,我發現佢之前仲苦練簽名。」至於被Sammi笑佢鬆散,阿芝話︰「佢哋笑自己係佛系同鬆散系姊妹,其實我哋係緊緻系姊妹。」

阿Sa好enjoy

另一好姊妹阿Sa蔡卓妍就話由於冇接新娘玩新郎嘅環節,笑指佢哋係最舒服嘅姊妹:「新娘一嚟就話冇玩新郎,我哋主要係負責靚。(冇得玩有冇失望?)最好唔好啦!費事玩人玩着自己。(最忙做啲咩?)主要都係影相同擺甫士,同嘉賓吹吓水。(幫手頂酒?)我都頂得幾杯嘅,其他姊妹就難講啲。」

讀者留言