古惑佬飛機擦鮑魚
廣告
古惑佬鄭伊健、陳小春、錢嘉樂、林曉峰同謝天華於內地開巡唱，近3個月幾乎每個周末都開唱，日前更誇張到包飛機趕場，而每個古惑佬座位除印有「歲月友情」logo外，椅套上更印有5人嘅名字，而飛機餐更係鮑魚麵，盡享VIP待遇！
伊健想做空少
對於今次同幕後團隊包機，小春興奮說：「我入行年資都唔少，試過坐快艇、電單車趕場做騷，但係包飛機都係第一次，仲要係台前幕後百幾人包一架民航機，真係威水！以前試過瞓飛機裏坐位通道，今次我要試吓霸晒最後一行四個座位，拉起晒啲扶手瞓覺。」而鄭伊健同林曉峰笑言想做空中少爺，伊健更表示想為眾人派飛機餐；謝天華就表示想試揸飛機！
天公造美
5子去長沙開騷前，當地連日落大雨，甚至開騷前一晚都傾盆大雨，點知當日天公造美，雖然期間落了陣毛毛雨，但仍不減fans熱情，齊齊揮動螢光棒又唱又跳，場面勁high！之後，有fans送上印有5子名字燈牌，包括鄭伊健幾乎無人記得英文名「Dior」、林曉峰花名「CELO」、小春英文名簡稱「A.J 36」、錢嘉樂古惑仔系列電影中名字「大頭仔」同謝天華英文名「Michael」，令古惑佬好感動！
