等兩年至中奬 患妊娠糖尿 吳日言：一日打4針直到BB出世
撰文：東方新地 | 圖片：新傳媒圖片、吳日言@ig
吳日言懷孕似中頭獎
懷胎六個月的吳日言，將於年底榮升媽媽，但其實BB得來不易，因為婚後兩年來Yan一直好想要BB，到後來受經痛困擾，檢查下才發現有朱古力瘤，雖然不影響懷孕及生育，但這兩年來她試過不少民間偏坊、食療也未能成功，直至今年初才「中獎」。今日她在IG話由兩年前想自然懷孕，到年頭驗排卵成功受孕，不經不覺就到距離生BB仲有100日，感覺好似中咗頭獎，這種運氣是用錢也換不來。她說：「從前總覺得自己運氣唔好，原來上天一早安排，將你這個小幸運交給我。」
患上妊娠糖尿 一日打4針直到BB出世
腹大便便的吳日言日前出席電影《行動代號：特工ex》首映禮。Yan透露早前做產檢發現血糖指數很高，因此住了3晚醫院，並證實患上妊娠糖尿。現在她每日都要自己在肚皮打4支胰島素針控制血糖直至BB出世，Yan又話：「醫生同我講會不斷加藥，但叫我唔使擔心，能夠控制到病情，生咗之後就唔使再打，自己希望BB健健康康。」佢又話最希望可以順產。
吳日言和Coffee(林芊妤)兩位孕媽一碰面有好多話題，事後吳日言喺IG上載二人合照，仲話終於有樣嘢畀Coffee大，就係孕肚，懷孕5個月的她孕肚比懷孕6個月的Coffee還要大！
吳日言話預產期係12月初，雖然佢已知BB性別，但就希望保持神秘，暫不向外公佈！
阿Yan在圈中人緣幾好，同小儀都好Friend！之前世界盃舉行期間，阿Yan就約咗「生煎飽王」蕭潤邦食飯，仲笑對方肚腩好似有咗BB咁大！
吳日言入行14年，原來佢當年膽粗粗寄demo去唱片公司自薦，結果加入麥浚龍旗下嘅唱片公司Silly Thing，當年Yan一出道就就憑佢個冬菇頭而成為標記，好多人至今仲記得佢個造型！不過兩年後因為公司轉型被解約，之後阿Yan自己接Job做，由歌手變到連泳衣騷都要接。
阿Yan早年接受訪問時透露，出道時所有造型，包括髮型、服裝，全部都係大寶(麥浚龍哥哥)決定。但原來她一直抗拒冬菇頭，因為她覺得自己都算是一名靚女，唔想梳一個中性嘅髮型！
04年7月，吳日言推出其首張個人唱片《Little One》，其中《我是外星人》、《點解問點解》、《扯線風箏》、《快樂時代》等都成為大熱K歌，而《扯線風箏》同麥浚龍首《耿耿於懷》以平行時空包裝，兩隻MV更是互相呼應，兩首歌都成為大熱K歌，而且在電台也獲得極高播放率。
早年商台DJ森美主演嘅《森之愛情》單元劇系列，就搵嚟多位靚女及人氣女星參演，當年阿Yan人氣高，都獲邀參演其中一集！之後森美同小儀又揾阿Yan一齊主持節目《架勢堂》，但好多聽眾喺電台網站留言反對，最後Yan又無得留低，再度失業。
到20110年阿Yan又同Neway Star簽約，但兩年後公司出現人事變動，薛嘉麟重執主權後要求佢改簽無底薪合約，最後阿Yan要求解約，但不獲任何賠償，佢炮轟公司不近人情。喺娛樂圈浮沉多年，阿Yan都算係地獄黑仔王，而在事業低潮，她曾經患上情緒病，幸而身邊有個由16歲開始拍拖嘅初戀男朋友，陪伴她度過難關！
老公是初戀男友
吳日言入行多年緋聞不多，她與圈外初戀男友Barry拍拖足足17年，Yan話她曾經變心半年，但始終覺得依家嘅老公係最好，最終二人走在一起。
二人在2016年10月於沖繩註冊結婚，雖然二人拍拖十多年，但阿Yan就話臨結婚前嘅兩、三年先見家長，佢仲話畀朋友笑佢：「醜佬終須見家翁。」講到求婚過程，她說：「都有心思嘅，佢叫朋友蒙住我對眼去公園，然後準備咗九十九支玫瑰花同戒指，仲有音樂同燈光。」
據知，圈外老公Barry有健身教練牌，早年本刊影到二人甜蜜遊銅鑼灣，原來當日Barry接阿Yan收工，之後兩口子行街，期間下大雨又為她擔傘，好細心！
在單親家庭成長，又是獨生女的吳日言，曾經說她不相信婚姻！
靠父畀＄200萬首期
據知阿Yan自幼在單親家庭長大，跟爸爸關係欠佳，直到近年父女溝通多了才有改善，當日阿Yan結婚，吳爸爸陪住出嫁是令她最感動的事。而早兩年阿Yan置業，她曾透露：「我睇緊樓準備上車，都係靠爸爸畀首期，唔好以為做藝人就好多錢，都係爸爸剩返畀我，首期都要200萬。」日前吳父生日，陀住BB嘅阿Yan都為爸爸搞生日派對！
