吳業坤想追女兒珊珊？家燕姐咁回應……

吳業坤同家燕姐都傳緋聞

話說逢女都冧、魚翁撒網式媾女，合作親都傳緋聞，無堅不的吳業坤早前再下一城，同67歲家燕姐去到台灣拍新年特備節目都竟然「撻得著」！人人叫「家燕姐」，佢叫「阿燕」，人人對前輩恭恭敬敬，佢竟然夠膽死當家燕姐係𡃁妹咁撩，爭住食家燕姐口水尾、食完話可以間接接吻、仲冧到爆話「仲有餘溫」㖭！

即係咁，有觀眾都睇唔過眼坤哥對住長輩冇禮貌，不過冧女嘅嘢你哋就真係有排都未去到坤哥境界，重點係氹到佢口中的「家燕」、「阿燕」好開心！坤哥，你又得咗喇！

吳業坤想追家燕姐大女？

話說早前吳業坤到新城接受家燕姐訪問，當時家燕姐曾笑稱勸坤哥唔好成日口花花，咁唔知家燕姐會唔會向坤哥介紹女仔？坤哥呢個時候竟然搶答：「珊珊 (家燕姐大女石祐珊)吖嘛，我電話都攞埋啦！」見慣大場面的家燕姐都當堂窒一窒，話感情事要慢慢來！

家燕姐咁樣回應…

家燕姐呢日出席節目《流行經典50年》錄影，被問到與吳業坤的緋聞，家燕姐笑稱根本係誤會，話坤哥只係口花花，並無實際行動。咁坤哥係咪想追其大女石祐珊呢？家燕姐就解釋係珊珊擔心兩人的緋聞，所以send訊息叫坤哥唔好亂嚟！正因為咁坤哥先會有珊珊電話。無論家燕姐又好、珊珊又好，坤哥都係收吓把口比較好，唔好亂嚟啦！