周杰倫

周杰倫天王女出巡 餅印女首曝光

最新娛聞

廣告

台灣天王周杰倫同24歲台澳混血老婆昆凌結婚三年多,先後誕下一對寶貝仔女,雖然周董同老婆不時在社交網晒仔女親密互動,但極之保護仔女隱私的他,放相唔係背面就例必遮遮掩掩,始終唔肯讓兩歲多女兒Hathaway(小周周)及十個月兒子Romeo(小小周)全面曝光,令大家非常好奇周董一對寶貝,同爸爸媽媽有幾似樣!不過,本刊日前就獨家捕獲天王女由媽咪昆凌陪出巡,兩歲九個月的小周周超活潑,行路蹦蹦跳,紮住牛角辮的她,面珠肥嘟嘟,但無論眼睛、小嘴和下巴,都同爸爸周董餅印一樣,得意度爆燈!

撰文:東方新地|圖片:新傳媒圖片庫、周杰倫IG

周杰倫護女 遮大半塊面

周杰倫同昆凌15年1月在英國古堡結婚,婚後已火速造人成功,女兒Hathaway(小周周)不經不覺已經兩歲九個月大,周董雖然不時會在個人社交網晒拖女親子生活,但始終唔肯讓仔女正面曝光,為免令子女真面目曝光,每次出入都十級戒備,令外界對周董一對寶貝更加充滿好奇。

完成香港演唱會後,周董舉家飛到澳洲開騷兼探昆凌父親,昆凌日前更興奮大晒同女兒母女裝曬太陽,身穿鬆身裙的昆凌肚凸凸疑似有孕,但依然貫徹低調作風,肥嘟嘟小周周戴住同媽咪同款的超大太陽鏡,遮咗大半塊面,仍然睇唔真天王女似爸爸定媽咪。

保持距離

為捧爸爸場,上月周杰倫在香港舉行演唱會,一家四口前後腳飛到香港,本刊更獨家捕獲天王女出巡,原來周董同老婆昆凌,為免女兒曝光,每次出街都同女兒保持一定距離,更搵專人全程護女。據知情人士透露:「小周周就快三歲,好鍾意跑跑跳跳,周董夫婦都會帶佢出去行街,等個女多啲活動,但依家人人手機都可以影到相,周董好緊張怕畀人影到個女,所以每次同個女出街,都刻意保持大段距離,遠距離望到實,再由專人貼身護女,去到室內地方或者上番車,先會行埋湊女,所以大家咪咁耐都影唔到佢同仔女一齊嘅相囉!」

超級活潑

不過,天王得意女就被本刊獨家捕獲,兩歲九個月的小周周首度爆光,個樣更似足爹哋周杰倫,而且超級活潑,當日昆凌到圓方逛名店,掃了幾袋戰利品,交由助手拎住,而小周周則由一男一女助手陪到實,在闊落的商場跑跑跳跳,走路更加動感十足,非常可愛;女兒遺傳周董嘅小眼睛,當日所見小周周就唔止對眼,連下巴甚至嘴仔,都同爸爸成個餅印,玩了一輪,一直相隔兩個舖位遠距離望實女兒的昆凌從遠處走近,男女助手就醒目護住天王女行去停車場上車,小周周上咗車,昆凌才走近七人車,上車都刻意前後腳,確保萬無一失。

唔請保母

出名女兒控的周杰倫,自從女兒出世後,亦開始減產留時間多陪家人,極之享受家庭生活的他,湊仔女亦鍾意親力親為。據知情者透露:「雖然貴為天王身家唔少,但周董湊仔女唔鍾意靠保母,所以屋企一直都冇請保母,就算仔女啱啱出世嗰時都冇,寧願同屋企人輪流照顧,但因為仔女仲細,成日半夜都會醒,佢又唔想老婆半夜起身湊女咁辛苦,寧願自己捱眼瞓,都會起身氹仔女瞓覺,佢真係個廿四孝爸爸,所以呢兩年,佢一直都唔多夠瞓,啲大時大節,本來係賺錢黃金時間,佢都寧願唔接工作,留番啲時間陪屋企人!」

讀歐洲學校

快三歲的周董女Hathaway,今年將入讀幼稚園,為培養女兒音樂天份,加上唔想佢有太大學習壓力,周董計劃讓女兒入讀位於台北士林區的台北歐洲學校。據知情人士透露:「因為係歐洲教育體系,所以校風比較開放,唔會畀小朋友有太多功課壓力,而且學校有完善嘅音樂師資,係國際級水準,啱晒節奏感強嘅小周周,一年嘅學費要成七十萬台幣(約18.8萬港元),而且面試一定要父母陪同。」

天王變慈父,周董每次出現都會大談仔女經,早前他就透露現時女兒會同兒子爭寵:「現在小周周會同弟弟爭寵,不管誰湊住弟弟,她都要搶過手來抱!」睇嚟做咗爸爸,39歲周杰倫幸福超晒標!如果昆凌成功陀第三胎,周董又有排忙!

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!