葡萄兄弟嘉穎做老襯 唐文龍趕撻女公關
撰文：東方新地｜圖片：新傳媒圖片、Instagram
唐文龍 獲兄弟鼓勵
拍完《溏心3》人氣急升，唐文龍被封男神筍盤，先後被拍到約會十億有錢女黃文意，又指撻著打女楊柳青，但原來通通係冇米粥，上月參加鄭嘉穎婚宴，更開到口想在兄弟中下一個結婚。據知情者透露：「文龍好羨慕嘉穎同Grace拍拖三年就修成正果，佢話自己仲冇著落，班兄弟咪鼓勵佢，話只要緣份到，可能下一個就係佢。佢不知幾受落，睇得出佢好恨快啲成家！」原來，唐文龍已成功撻著女公關新歡，曾介入周永恆趙頌茹婚姻的小三Ruby (劉依靜)。
本來大纜扯唔埋，不過一次友人飯局就將正氣型佬唐文龍同Ruby劉依靜拉埋。據知情者透露：「Ruby覺得文龍好博學，同佢一齊有好多話題，文龍好鍾意研究電影，咁啱Ruby又鍾意睇戲，加上嚟緊Ruby公司會投資搞環保塑膠生意，文龍係支持環保人士，所以成日搵文龍攞意見，佢哋真係好投契！」
心花怒放
日前本刊獨家斷正二人到尖沙咀拍拖撐枱腳直落睇戲，當日傍晚時分，唐文龍在尖沙咀亞士厘道一間茶餐廳外同友人傾偈，未幾就一個人入餐廳搵了一個隱蔽位置坐低，大約15分鐘後，女主角終於現身，當日Ruby明顯悉心打扮會情郎，甫坐低已經對住男神冧到爆，唐文龍打開餐牌介紹Ruby有乜好選擇，但似乎食物吸引唔到佢，對眼全程望到男神實一實，食物未到，唐文龍心花怒放講唔停，還攞出一本命理書同女方講相學運程，女方就嗒晒糖托住腮聽到入晒神。撐枱腳個半小時，由唐文龍埋單一齊離開，兩人急急腳截的士轉場去黃埔，原來係拍拖睇近期熱爆電影《逆流大叔》。
朝結婚方向
熱戀情侶見少一日都心掛掛，翌日唐文龍又再約會Ruby，當日下午一時多，唐文龍揸住佢架落地不久的過百萬波子Jeep，由奧海城寓所出發，先去郵局寄包裹，之後再揸車會合Ruby，Ruby還將兩人撐枱腳的合照，放上IG開心share，只見托住腮的Ruby貼實雙眼含春的唐文龍，就算簡單食茶餐廳，已經有情飲水飽閃到暈！
對於撻著唐文龍，Ruby坦言同對方係好朋友，還大讚對方是好男人：「佢份人好陽光好健康，對人好體貼，亦好gentleman，性格係咪真係夾，就要了解吓先知！」她坦言自己已經三十歲年紀唔細，再拍拖會好謹慎，希望朝住結婚方向搵對象。
同Ruby打得火熱，被本刊斷正翌日，唐文龍再約Ruby撐枱腳，女方更開心share，將二人合照放上個人社交網，還留言叫男方加油!唐文龍亦火速回應：「係，一齊加油！」
跌落人生谷底
14年曾經介入周永恆趙頌茹婚姻，賠上事業毀了聲譽，Ruby形容當時簡直跌咗落人生黑洞，問到渣男周永恆是否她的人生污點，Ruby直言：「佢不值一提，就當發咗場噩夢！」更承認再投入新感情會更加謹慎：「嗰時自己處理得唔好，再拍拖會好謹慎，唔想再重蹈覆轍，以後會更加愛惜自己同屋企人！」
同周永恆感情只維持一年就分手，有指周永恆同阿Yu分居後將Ruby當出氣袋，性情暴躁經常無理吵鬧，長期活在暴力陰影下的Ruby，又要負擔兩人生活費，最終頂唔順分手。她坦言：「嗰次經歷令自己跌咗落人生谷底，嗰時好無助，更加因為咁患咗驚恐症，唔敢出街，好彩有朋友不停鼓勵，不過亦明白最後要企番起身，都係要靠自己，每個人都應該有重新開始嘅機會同生活！過去嘅唔再提嘞！」
成功嗒到正氣唐文龍，應該是人生一個好開始吧！
合作鬧緋聞
早前同打女楊柳青 (後排左二) 傳緋聞，唐文龍解釋同女方只係朋友關係，之前一齊拍詠春短片，近日又合作拍電視劇《解決師》。
冇米粥
去年11月生日，唐文龍同十億有錢女黃文意去大嶼山遊大佛，亦因女方po相令戀情見光死。
