Gin Lee

【多圖】唱完紅館騷 Gin Lee預告性感遊泰國

最新娛聞

廣告

實力派女歌手李幸倪(Gin Lee)一連兩日嘅紅館處女騷日前圓滿結束,騷上除咗請側田、AGA同許志安等歌手朋友做嘉賓,仲有Gin Lee嘅家人都有上台演出,Gin Lee仲喺台上大爆昔日隻身來港發展嘅辛酸史!騷後佢預告將會放自己大假,請屋企一齊去泰國旅行,仲話會著上性感泳衣,因為「餓咗好耐,keep得咁辛苦,唔好嘥咗佢!」

撰文:東方新地|圖片:新傳媒圖片庫、Gin Lee IG

Gin Lee 一家五口同台演出

Gin Lee首個紅館演唱會《Gin Lee 李幸倪 First Of All Live》,邀請咗全家人上台助陣,全部統一著深藍色嘅「家庭裝」,爸爸負責打鼓,姐夫彈bass,媽媽同姐姐就同Gin Lee合唱〈給我一個吻〉,之後Gin Lee再同家姐合唱〈我也不想這樣〉,Gin Lee更力sell家姐,叫公司簽埋佢做歌手。

來自馬來西亞嘅Gin Lee憶述父母首次來港探望時嘅經歷:「佢哋攞住兩個大篋諗住畀驚喜我,點知一開門,媽咪見到我居住環境咁樣,就擰轉面偷喊,因為間屋一係企到個人,或只能放兩個篋,原來個女喺出面咁辛苦!」Gin Lee話爸爸當時打圓場話﹕「幾得意,打掃方便,兩秒搞掂。」但媽媽之後每次打畀佢,都會話如果好辛苦就不如唔好唱歌。

Gin Leen又指家人一直好擔心佢,所以當佢有少少成績,就想畀家人一齊見證,知道其實佢依家係過得好好。

Gin Lee出道9年,隻身來港發展亦有7年,經歷過唔少辛酸,佢話:「2010年嚟香港踢館,2011年就嚟香港住,當時我喺香港無依無靠,試過有晚凌晨2點我肚痛到郁唔到,唔知可以打畀邊個,又唔敢叫白車,每逢過節見到一家人食飯,我嗰刻都會⋯⋯」佢仲話試過窮到冇錢交租,唔知點樣繼續行,佢勸勉大家面對解決唔到嘅問題時,要相信「明天會更好」!

Gin Lee指家人對佢影響好大,係佢音樂上啟蒙老師,令佢聽歌嘅variety好闊,佢仲大晒童年照,以及少女時代嘅照片。

Gin Lee指完騷後會做「乖乖女」,請全家人一齊去泰國旅行兼食餐好,又預告會著上性感泳衣,因為:「真係餓咗好耐,哈哈!Keep得咁辛苦唔好嘥咗佢!」但就拒絕承諾post相:「我冇話post,著咋嘛,哈哈!」

性感造型 Deep V露背晒腿

Gin Lee喺騷上著上多套性感戰衣,包括超低胸嘅花花歌衫、大露背嘅粉紅色高衩長裙,以及Deep V加大脾位開窿嘅絲質連身褲等。

Gin Lee仲邊唱邊跳大膽椅子舞,做出擘脾、趷籮等性感動作,佢話今次練舞練咗幾個月,因此發現自己好鍾意跳舞:「但當中有好多不足地方仲要多啲練習。」又透露正洽談嚟緊嘅巡迴演出,有機會由內地開始巡迴。

側田大讚「好Hot」

今次Gin Lee嘅演唱會分別搵來好友側田、AGA(江海迦)以及許志安做表演嘉賓,Gin Lee早前透露因當年隻身來港發展,導致佢同青梅竹馬嘅男友分手收場,AGA一出場時就幫Gin Lee徵男友

許志安則預祝Gin Lee演唱會長開長有:「呢個係『First of All』演唱會,希望你之後會有『Second of All』、『Third of All』,係咁『All』嘅演唱會!」佢又大讚Gin Lee好勤力:「我幾年前喺節目度認識Gin,記得個節目係錄到朝早6點,但佢好捱得,好用心唱歌,希望佢有日可以屬於自己嘅舞台,啲人聽佢唱歌係聽到6點!」

側田同Gin Lee合唱〈Kong〉同〈愛是永恆〉,大讚Gin Lee「好Hot」,又向Gin Lee送抱話:「同你太熟唔知講咩好,但由新人到依家見到你進步咗好多,So proud of you!希望未來有更多合作機會。」

葉蒨文同Eric Kwok都有去睇Gin Lee嘅演唱會。

其他捧場嘅藝人朋友仲有劉美君、陳志雲、盧冠廷、蔡一智及林欣彤等。

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!

關鍵詞
演唱會