地獄廚神

《美女廚房》新.地獄廚神(上): 生㗎!俾太陽曬都熟過佢哋煮!

最新娛聞

廣告

無綫節目《美女廚房》第三輯由今年六月開播到依家,每星期都帶咗唔少笑料俾大家,有今日嘅成績,節目組真係要多謝返咁多集以嚟嘅地獄廚神!雖然就辛苦哂主持人同嘉賓嘅腸胃喇!依家就一齊嚟睇吓《美女廚房》2018年嘅新.地獄廚神啦!溫馨提示:生嘢,真係唔可以亂食!

撰文:東方新地 | 圖片:TVB節目截圖、影視截圖

《美女廚房》新.地獄廚神(上)

地獄廚神嘅一大特色,就係佢哋神乎奇技嘅烹飪方法,會令一切都煮唔熟,令人不禁懷疑佢哋煮咁耐究竟係煮咗啲咩⋯⋯

1.吳若希 負25分!

吳若希嘅地獄菜式簡單嚟講就係「全生」雞卷伴「生」蠔汁!真係想問吓阿人妻,點解你舊雞煮完都係透明粉紅色嘅?點解嘅?點解完全係生嘅?

難怪阿BOB會直接攞垃圾筒出嚟!

2. 朱晨麗 負29分!

朱晨麗嘅地獄菜式就係「液晶體流心瀨尿蝦」!唔好玩啦大佬,唔係所有嘢流心就係好食㗎!!!

連唔怕食生嘢嘅Jacques師傅都頂唔緊啊!

3.劉佩玥 負29分!

見到劉佩玥拎住把刀去煎嘢嘅時候,在座嘅主持人同嘉賓都深知瀨嘢啦今次!原本嘅指定菜式係焗法國鵪鶉伴青豆蓉⋯⋯

阿BOB睇見劉佩玥咁煎法都覺得不安,就叫佢切開隻鵪鶉睇吓,點知⋯⋯

輪到地獄廚神自己試食,睇嚟佢自己都唔敢食!因為曹永廉講得無錯,真係太陽曬都熟過佢煎啊!!

4. 蘇麗珊 負38分!

蘇麗珊要煮嘅指定菜式係「豬網油松露野菌伴薯仔麵糰」,但碟餸點睇都係得層皮熟嘅「全生」雞卷!!阿BOB喺蘇麗珊試食嗰時都忍唔住叫佢搵啲熟少少嘅位試!

啲雞肉,粉紅色、晶瑩剔透咁,真係用水淥一淥都熟過佢煮咁耐⋯⋯

以為地獄廚神得呢啲斤兩,實在係太天真啦!!!因為煮得熟唔代表擺得落口,咁先係地獄廚神嘅最高境界,敬請留意下集啦!

讀者留言