拍拖八年結婚兩年 徐天佑：同太太計劃生BB

撰文：東方新地

圖片：新傳媒圖片庫

徐天佑 結婚獲粉絲支持

徐天佑兩年前跟舊同學走進教堂共諧連理，他自己都話覺得好難得：「我同佢拍拖嗰個年代，出街仲係唔拖得手、鬼鬼祟祟、又驚畀人影到，我覺得點解個世界仲係咁，所以我先至公開，到兩年前我老婆都三字頭，我就諗我唔係吓吓諗住自己嘅新聞，都係時候結婚嘞。之後外間同粉絲嘅反應又OK喎，原來大家都好支持！」

感情慢熱

被問到咁多年嚟有冇女仔埋身？徐天佑答：「其實都有遇到嘅，但因為我認識一個人之後，要有長啲嘅時間至發展到，要有好熟嘅感覺先得，要我認識一個新嘅人，重新去培養感情，唔係咁易，所以可能我畀人感覺專一啲。」徐天佑又讚老婆令他學識儲錢：「我之前一個人有幾多使幾多，反而係識咗我老婆，先知道原來係要儲錢。」

忙完演唱會計劃「造人」

講到結婚兩年多，有冇計劃生B？徐天佑笑言：「有呀，啱啱結婚嘅時候，我係未ready，太多顧慮，我自己諗好多嘢，生出嚟，邊個睇住佢、工人會唔會整親佢，乜嘢都諗，依家結咗婚兩年，同老婆傾過，又覺得好似ready啲，依家計劃緊，忙埋呢排先啦！」