胡定欣

拒與鵬同行 胡定欣 約滿即撇

最新娛聞

廣告

胡定欣16年與陳展鵬在劇集《城寨英雄》飾演刁蘭與拳佬入晒戲,完劇依然黐實登台出騷,仲一齊拎視后視帝,之後再以情侶檔拍多套《同盟》,高調放閃看似男有心女有意,點知胡定欣只是煙幕,轉頭陳展鵬被斷正車載單文柔上山頂開餐。

被利用到盡頭唔嬲就假,心有刺的胡定欣此後與陳展鵬保持距離,近日公布《城寨》及《同盟》兩劇組班底再埋班開新劇《曼谷唐人街》,胡定欣一早表明唔想再同陳展鵬拍檔,更有傳兩年內約滿無綫後,即離巢外闖。兩年冇拖拍,胡定欣事業卻愈見起色,連攞兩次視后坐穩無綫一姐之位,最近進軍影壇又做舞台劇,撈得非常掂。自己有本事有得揀,都唔想再對住隻煎Pang眼冤啦!

撰文:東方新地|圖片:新傳媒圖片庫、胡定欣IG

胡定欣 懵然不知被消費

胡定欣入行十九年,每次拍拖都不過三年,兩年前與音樂人陳明道分手後,她邊搏殺邊找尋Mr. Right,與陳展鵬拍《城寨英雄》時過從甚密,曾被影過在將軍澳電視城飯堂撐枱腳,人前人後打情罵俏,之後再拍《同盟》仍然keep住道熱情,正當全世界都以為二人有機發展時,陳展鵬卻被斷正媾掂16年港姐單文柔,並反轉豬肚與胡定欣劃清界線:「我從來冇同胡定欣拍拖。」胡定欣如夢初醒hurt到震。

據知情者透露:「定欣對人好真,拍劇時煎Pang對佢好好,佢亦覺得呢個男仔唔差可以觀望吓,之後一齊拎視后視帝,大家都認定佢哋係一對,煎Pang從來冇提過有其他目標,每次出活動同出騷,佢都交足戲畀晒男友feel,咁定欣亦好自然投入咗感情,點知轉頭煎Pang畀人影到同單文柔一齊,定欣先知道自己一直被消費,佢班好姊妹都睇唔過眼,叫佢以後同煎Pang劃清界線,無謂再益佢。好多監製都知定欣唔想同煎Pang再合作拍劇,但出去登台出event嗰啲,唔使日對夜對一次性嘅,定欣睇錢份上會照做。」故早前《城寨》及《同盟》的監製文偉鴻想再原班人馬開新劇《曼谷唐人街》,最後演員名單有陳展鵬、姚子羚、陳山聰及伍允龍等,獨缺胡定欣,眾演員將會打到去泰國曼谷,一齊出埠當然好玩,據知胡定欣因不欲與鵬同行而激罕推劇。

取消關注IG不相往來

處事冷靜EQ甚高的胡定欣,8月初被發現靜悄悄地取消關注陳展鵬的IG,在胡定欣IG三百多名「追蹤名單」中已找不到陳展鵬的賬戶,而陳展鵬IG亦都冇關注胡定欣,好明顯雙方再見不是朋友,以後亦不需在IG假扮友好。知情者透露:「單文柔未出現,煎Pang不停po同定欣拍劇時嘅親密劇照上IG,又話女方係佢嘅靈感女神,當時仲成日放合照tag埋對方嘅IG賬戶不停留言放閃,之後煎Pang公開同單文柔拍拖,唔知係被迫定自動洗底,煎Pang刪除咗好多同定欣嘅po。既然大家以後不相往來,定欣直頭取消關注煎Pang,乾淨利落。」

做得出唔怕認,胡定欣在本刊今期的專訪中,亦大方回應取消陳展鵬IG一事,她說:「唔需要解釋,我會覺得係好個人嘅一件事,取消或者關注唔代表啲乜嘢嘅,我可能有一日成個account都delete咗佢呢,哈哈哈哈哈!我覺得唔需要放大去睇囉!唔代表私底下我哋兩個唔會講嘢、唔係同事。」陳展鵬曾被影過做柴可夫車胡定欣開工,放工又車對方入西貢食糖水,仲孖住睇演唱會。由攬頭攬頸好拍檔淪為胡定欣口中所指的同事,陳展鵬被極速降呢。

離巢外闖好時機

無綫內有眼中釘,此地亦不宜久留,兩度奪視后的胡定欣現在有名有利,4月拍完《包青天再起風雲》便開始休假,雖然唔接劇,但她一樣冇停過,先與馬浚偉合演舞台劇《偶然‧徐志摩》,之後馬不停蹄出埠登台,最近又忙為處女電影《逆流大叔》宣傳,首次進軍影壇與舞台劇界的她,頓感外面世界之大,更加令她萌生約滿離巢外闖之意。據知胡定欣與無綫仍有約兩年約,近年電視台花旦不是結婚就生仔,留低拍劇的一線花旦已所剩無幾,胡定欣最近在電影與舞台劇方面都表現出色,37歲的她見自己在外有市有價,亦決定約滿後與無綫換個合作方式,很可能一年只拍一劇,不再受到合約束縛,做自己想做的事。

這幾年為無綫劇接劇,胡定欣辛勞過後都想放慢腳步,今年下半年度她決定一套劇都唔接,只拍旅遊特輯與好姊妹飲飲食食,至於被指與細六年的張振朗暗撻,雖然雙雙否認戀情,但胡定欣冇落閘,不止一次公開讚張振朗係好男仔。經過煎Pang一役,相信胡定欣以後會更加帶眼識人,劣質煎Pang不要也罷,慢慢揀隻優質股仲好啦!

去中環扮靚

最近休假的胡定欣素顏現身中環,到髮型屋扮靚,泊好車後她邊行邊接受本刊記者訪問,有問必答的她心情非常好。

胡定欣表示翌日要返國內登台,整完頭便駕車返家休息。

轉戰影壇

由胡定欣擔正做女一的電影《逆流大叔》票房衝破600萬,贏盡口碑,吳鎮宇揚言要再搵胡定欣開拍《逆流大嬸》,靠實力令事業攀上頂峰,胡定欣開到口話好想拍電影,分分鐘學佘詩曼、胡杏兒和楊怡等離巢搵真銀。

芳心寂寞

事業得意愛情失意的胡定欣,早前為舞台劇綵排時對鏡自拍,夜闌人靜抒發孤寂等愛之情:「戲內戲外都是孤寂的⋯⋯」

Nancy Wu 胡定欣(@nwuuu)分享的貼文 張貼

盛傳姊弟戀

胡定欣與張振朗被傳因合作拍新劇《包青天再起風雲》擦出火花,發展相差6歲的姊弟戀。事緣張振朗7月20日生日,晒出「展昭」造型蛋糕,負責製作的蛋糕師正是胡定欣好友,有指是她專誠訂製蛋糕送男方驚喜。將於9月9日生日的胡定欣,日前亦收到同款蛋糕。

Nancy Wu 胡定欣(@nwuuu)分享的貼文 張貼

二人先去橫店再去新彊,連拍50日外景日對夜對,張振朗與胡定欣更是形影不離,飾演「展昭」的張振朗為氹胡定欣,不時主動撩玩自拍,而胡定欣亦玩得好開心,好受落。

愈愛愈高調

戀情被踢爆年半,陳展鵬由最初死口唔認到現在情侶檔出活動搵銀,不時與單文柔同框放閃,早前上節目《美女廚房》做嘉賓更處處維護女友。雖然愈愛愈高調,表面好幸福,但有指因當日揀嫩口港姐而有負於胡定欣,令陳展鵬形象扣分,人氣停滯不前。

姊妹力撐

無論高潮抑或低潮,胡定欣都有「胡說八道會」一班好姊妹在身邊支持她,早前舞台劇公演,眾人拉大隊去撐她,成為她背後最強大的支柱。

Nancy Wu 胡定欣(@nwuuu)分享的貼文 張貼

Nancy Wu 胡定欣(@nwuuu)分享的貼文 張貼

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!