文凱玲《衛斯理》演打女 性感邪花其實是孝順乖女
撰文：東方新地｜圖片：新傳媒、劇照、微博
文凱玲《衛斯理》演型格打女
《冒險王衛斯理之支離人》中，文凱玲飾演殺手組織「黑天使」頭目羅剎，一頭白金色短髮非常有型，劇中亦有連場動作戲，同其餘靚女角色好唔同！文凱玲向來俾人感覺較柔弱、斯文，今次可算一大突破！
文凱玲去年處女拍劇
去年播出的TVB劇《賭城群英會》頗有新鮮感，請得四哥、叻哥及陳法蓉出山，馬國明、佘詩曼、黃浩然等一線演員坐陣，仲有劇集新貴何浩文及文凱玲！文凱玲劇中飾演電腦宅女黃小南，與阿佘、高Ling為三師姐妹，大多時候都係紥馬尾戴眼鏡的乖乖女look示人，夠晒「Girlfriendable」！
小背心短褲勁吸睛
雖然文凱玲呢個角色並不賣弄性感，但不時都會着短褲短裙仔晒美腿，早前一集見到佢着住件低胸小背心同超短睡褲仔，即時將阿佘同高Ling比下去！
泳衣戲勁吸睛
王晶出品例必大灑鹽花，而《賭城群英會》中亦有場泳池戲，高海寧著泳衣當然搶鏡，但亦有不少巴打大讚文凱玲身材均稱，兩位性感女神，真係勢均力敵。
文凱玲 2010年港姐第八名
多年前做過空姐的Connie其實係港姐出身，2010年時佢以27歲之齡「掹車邊」參選，不過成績只得第八名，同屆冠亞季軍分別係陳庭欣、張秀文同莊思明。落選後，文凱玲並沒有和無綫簽約，但獲李蘊經理人賞識簽約為旗下藝人，先後參演多部電影。
落選後變晶女郎
落選後佢轉投電影圈，先後拍過錢國偉執導的《喜愛夜蒲2》同《喜愛夜蒲3》，以及多部王晶監製電影《唐伯虎衝上雲霄》、《賭城風雲II》同《鴨王2》等，力sell其33D上圍加42吋美腿。在《鴨王2》仲同何浩文有多場埋身肉搏戰！
同家人睇自己作品
文凱玲表示，除了《鴨王2 – 雞同鴨戀 》之外，每套電影都同屋企人一齊睇，當中《唐伯虎衝上雲霄》有一幕係好清楚見到佢背面的下半身，但文爸爸安然接受，令佢好放心，佢指自己的人生要由自己決定。
派傳單幫補家計
近年文凱玲在影壇上工作量有增無減，收入大增，但佢唔會因此而做大花筒。形象性感的Connie是家中長女，也是經濟支柱之一。爸爸任職地盤工人，母為家庭主婦，家中有一弟一妹，懂事的文凱玲自小認為身為長女要為屋企出一分力，所以早喺15歲時已為幫補家計做兼職派傳單。而讀完書出社會工作後，文凱玲更把一半人工交給父母，其餘大部分人工儲起，以避不時之需，識諗又顧家。
邪花 vs 四眼宅女
上文提到文凱玲10年時以27歲之齡選港姐… 無錯！其實佢已經35歲啦！唔少人睇劇時仲以為佢只係廿幾歲。以前經常走性感路線、帶點「邪花」味道的文凱玲收起噴血上圍，之前架上眼鏡做個斯文女，今次則做短髮打女，效果似乎相當理想！希望將來再有機會睇佢拍劇啦～
剪咗短頭髮就有另一種美～
