早霸王 | 九唔搭八女聽眾亂入節目 煩到森美小儀爆seed逼走觀眾
廣告
由森美、小儀和Marco主持的商台電台節目《早霸王》一直受到聽眾的喜愛，有不少聽眾都會打上去分享自己的故事。今日就有一位女聽眾打上去分享，卻被三位主持制止要求收口，雖然三位主持狠到爆，但一班聽眾卻竟然一面倒支持三位主持，仲幫口一齊鬧！
《早霸王》女聽眾九唔搭八 聽到森美小儀發猛掙
今日《早霸王》就有一名女聽眾打入節目，一開波就用5分鐘時間去大讚三位主持人，分別讚森美份人夠有深度，又讚小儀聰明同Marco夠內斂。聽到森美唔耐煩想cut線嘅時候，該聽眾才願意入正題。
女聽眾表示自己老公平日工作忙，不過最近就有10日假期，雖然老公想用全部假期去英國探朋友，但女聽眾就想去泰國過二人世界。森美對此就表示現時可以到外國探望朋友是一個難能可貴的機會，所以建議女聽眾先陪老公到英國探朋友，之後再要求老公另擇多3日假期陪聽眾到泰國過二人世界。不過女聽眾就突然九唔搭八地表示會遷就老公，但前提下要老公加家用，聽到三位主持和一班聽眾都非常無言。
之後，聽眾仲話自己打上嚟係想森美撐佢去泰國，點知竟然得到相反結果，搞到3位主持人都即刻話：「唔會呀，唔會撐你喎，因為去探朋友係千載難逢嘅機會，泰國幾時去都得。」
森美小儀爆seed逼走聽眾：有咩上環球膠報講
最後，三位主持人想作總結嘅時候，該聽眾又再話能夠打上去《早霸王》覺得好開心，並且想再講其他嘢，但三位主持馬上異口同聲咁制止佢，森美仲爆Seed話：「有咩想講就上網講，唔駛DM我，直接去《環球膠報》講。」小儀亦笑言表示《環球膠報》會報道此新聞，Marco就在旁加把口話：「個標題會係『森美迫走聽眾』 」
網民一面倒支持：收佢線啦
女聽眾九唔搭八亂入《早霸王》除了搞到森美等人非常無言之外，連一班聽眾都聽到唔耐煩，紛紛在《早霸王》專頁留言表示該名女聽眾浪費時間，仲話：「講咁耐都入唔到正題，我係你老公寧願對朋友，都多過對住你。」
圖片來源：Facebook@早霸王 Good Morning King、Facebook@Sammy Leung、IG@sammy903、網民留言截圖
