李嘉慧低調億萬新抱長腿囡囡初長成

李嘉慧家族資產60億

今年43歲的李嘉慧住愛民邨出身、95年選港姐出道，不過當選最上鏡小姐同亞軍後唔似得冠軍楊婉儀簽約拍劇，反而經翁為德介紹簽約模特兒公司行catwalk做超模，05年與馬來西亞金融才俊任偉成結婚後索性退出幕前，連生三個女Valerie、Sylvia同Viola。

李嘉慧嫁人13年來全職相夫教女做少奶，夫家富貴所以唔單止絕跡幕前，連廣告、品牌活動都極少蒲頭，生活極之低調，不過呢個少奶入門後極好腳頭，丈夫事業愈做愈大、去年更和母親將旗下戶外廣告公司奧傳思維上市，市值一度直上59億！

日前億萬新抱難得出關，由司機接載一拖二去到銅鑼灣行街街，身邊唔見三歲幼女Viola，只見12歲的Valerie同10歲的Sylvia。果然系出名「模」，媽媽身高5呎10吋，年僅12歲的Valerie亦遺傳九頭身靚身形同筆直長腳，身高已經拍得住媽媽膊頭。

兩個囡囡陪完睇化妝品，李嘉慧再請食期間限定軟雪糕慰勞番兩個乖女。其實Valerie八年前四歲時就已經被媽媽帶過見記者、行catwalk，當年驚青爆喊大眼妹如今長得亭亭玉立、五官出眾，大有潛力繼承衣鉢做超模！