東京奧運|張家朗處男直播大方提陳約臨 直認單身被隊友爆7大擇偶條件
文:東方新地|圖:張家朗IG、吳諾弘IG、張小倫IG
東京奧運花劍隊處男開直播
東京奧運男子花劍隊日前離開東京,張家朗、大師兄張小倫及蔡俊彥直接到深圳準備全運會,而吳諾弘則回港養腳傷,四人分別在香港及深圳進行隔離,吳諾弘發起跟師兄們一起開live,今次更是他們首次開live,當中有不少蝦碌事,最爆張家朗被隊友們不停爆料,一小時直播笑料百出﹗
![東京奧運後,吳諾弘聯同張家朗及大師兄張小倫開直播﹗(圖片來源:吳諾弘IG)](https://imgs.orientalsunday.hk/wp-content/uploads/2021/08/bb4772f7-7bf9-434a-b70c-b688ee29aae0_60605507610b5d1c2ba2a-576x1024.jpeg)
東京奧運|張家朗大方提陳約臨:我唔覺得咩大事﹗
張家朗、吳諾弘、張小倫及沒有出戰奧運的崔浩然開Live,高峰時達1.8萬人收看直播,直播有人提到陳約臨事件,張家朗最初話:「唔好講喇﹗」大師兄張小倫就話:「其實Kelly(陳約臨)好好人,嚟到嗰幾日都搵我哋做訪問,佢係興奮啫,佢其實好好人,我之後都有message同佢講其實好小事﹗」張家朗不停點頭和應:「我都覺得唔係咩大事﹗」
![首次開直播的三人,期間發生不少蝦碌事,分別唔識開「你問我答」功能、唔識點save低直播片以及留言遮畫面不懂如何處理,不停向網民發民,吳諾弘話:「我都係女朋友教我咋﹗」張家朗又話:「第一次開直播﹗唔識搞喎﹗」充滿笑料﹗(圖片來源:吳諾弘IG)](https://imgs.orientalsunday.hk/wp-content/uploads/2021/08/2292b39a-87a9-4b52-8cdf-7f4f63a2c827_333943821610b5d6c85ada-576x1024.jpeg)
大師兄爆張家朗花名
張家朗在直播中不停被師兄弟們爆料,大師兄張小倫率先爆平時稱呼張家朗做「Jer Jer 」,大家問有是否有特別意思,怕醜仔張家朗突然變高音話:「咩呀﹗因為我姓張之嘛,冇其他意思﹗」大師兄其後又指吳諾弘花名叫Kobe,指吳諾弘在團體賽時傷腳,在場邊的師兄們大叫Kobe,想提醒吳諾弘好似NBA高比拜仁一樣不要放棄,張小倫爆開有癮又指張家朗都有一個NBA的球星花名,就是「字母哥」(NBA希臘球星 Giannis Antetokounmpo),不過張家朗話自己想做洛文多啲,大師兄就話返港後要相約打籃球﹗
師兄爆完到師弟,吳諾弘爆張家朗最鍾意在沖涼時興奮高歌:「有次我喺出面玩劍,聽到好大聲唱歌,入房聽到原來係家朗喺度唱歌,唱得好大聲㗎,好忘我﹗」大師兄和應指唱得好好聽,又叫張家朗即席表演,張家朗即怕醜仔上身話唔會唱﹗
![出戰東京奧運的香港花劍男子隊,大家情同兄弟﹗(圖片來源:張小倫IG)](https://imgs.orientalsunday.hk/wp-content/uploads/2021/08/cheungkalonggggg_208565119_196996108880757_7835769510460650647_n_1969694331610b60381936d.jpg)
張家朗公開認單身 吳諾弘代答擇偶條件
有網民留言問張家朗的感情狀況,大師兄張小倫代答:「佢依家單身,冇女朋友﹗」張家朗亦親口答:「依家單身﹗」吳諾弘即爆張家朗的擇偶條件:「呢啲我知,我答,要高、要乖、要對佢好、要孝順﹗對佢父母好﹗」大師兄再接力:「仲有一定要唔好煩佢囉﹗同埋要好支持佢﹗」張家朗笑住話:「你講晒全隊人要嘅條件喎﹗」吳諾弘被大師兄問理想的另一半係點,吳諾弘即賣口乖:「我女朋友咪係我嘅理想型囉﹗」
![(圖片來源:)](https://imgs.orientalsunday.hk/wp-content/uploads/2021/07/-2021-07-27-1.48.17_51621968660ffa00ee0b1a-882x1024.jpg)
張家朗發言不及師兄弟們多,張小倫指要多多訓練張家朗講嘢,張家朗怕怕醜咁話:「其實已經好咗好多﹗」期間有網民問張家朗係咪好疲倦,張家朗笑住話:「我好精神呀,我個樣係咁,啲人成日以為我好眼瞓,其實唔係﹗」有人問張家朗對眼有幾大,張家朗答:「我對眼好細﹗」又應大家要求擘大對眼靠近鏡頭,相當搞笑﹗
![其後香港隊友崔浩然加入直播,張家朗被問到對眼有幾大,又應大家要求擘大對眼然後靠近鏡頭,相當搞笑﹗(圖片來源:吳諾弘IG)](https://imgs.orientalsunday.hk/wp-content/uploads/2021/08/497c4b0d-6cb6-459d-a877-420da484b453_1239206532610b613455adb-576x1024.jpeg)
有網民問到張家朗曾提及以前玩劍時脾氣好大,吳諾弘即爭住示範張家朗發脾氣時會怒掟頭罩的一幕,張家朗笑指現在收斂了﹗師兄們之間的談話足見大家感情好好,無所不談﹗
![吳諾弘指近來好多人重提張家朗的防蚊廣告,指他劍擊技術好到可以刺中蚊﹗(圖片來源:衛生署廣告)](https://imgs.orientalsunday.hk/wp-content/uploads/2021/08/9fdaecdb-ee45-4bd2-a9c1-e59ac5fcc105_1254057027610b68c2d925a-1024x768.jpeg)