林子善

林子善係絕世顧家男 買樓贈父母幫阿哥上車

最新娛聞

廣告

林子善在《果欄中的江湖大嫂》中飾演的馮光輝(蓆仔)心地善良又有情有義,現實中林子善亦係個顧家好男人,早年在大坑開設龍鳳冰室,為經營好餐廳一直親力親為,唔止咁!子善都係好愛錫家人,慳埋嘅錢買樓安頓父母,子善之後也曾經借老婆本助胞兄買樓上車。子善婚期將至,希望呢位顧家男都得到幸福啦!

撰文:東方新地|圖片:新傳媒圖片庫、林子善FB

《果欄》林子善 係娛圈顧家男

林子善在屯門屋邨長大,16歲跟周星馳入行,在《喜劇之王》飾演「洪爺」一角,少年得志,但後來周星馳同拍檔拆夥,林子善因此近三年完全冇工開、零收入,之後做過時裝店sales、夜場DJ,到08年獲黃子華引薦入無綫拍《奸人堅》,事業先開始好轉。2012年,林子善與拍檔夾份投資首間龍鳳冰室,至今已有四間分店。

林子善話因為試過有兩年冇工開,當時生活好慘也曾經捱過,所以如今事業有起色,對未來嘅事佢會諗得更周詳:「依家要照顧老婆,要諗得更長遠,諗定之後兩年目標係咩,我要努力搵錢買樓,同太太組織家庭,因為之前買樓畀父母,又幫阿哥上車買樓,依家終於可以為自己打算吓!」

買樓贈父母幫阿哥上車

原來林子善首次置業,係以零首期方式買入屯門豫豐花園一個200多萬元單位,佢將豫豐花園放租兩年,之後自住咗三年後放售,把賺到嘅錢買入屯門藍地一間三層高嘅村屋送畀父母居住,佢話當時樓價215萬元,畀咗六成首期,每月供款只需3,000多元,而佢自己就為咗睇住冰室嘅生意,租住緊大坑一個單位。

義氣仔女

「其實幫阿哥上車嘅錢,我係用老婆本,但兄弟一場,既然哥哥開到聲一定會幫,姪仔出世,哥哥同阿嫂又唔太識理財,長此落去會好危險,我需要為佢諗一諗,既然佢想上車,我就幫佢,連自己兄弟都唔幫就真係冇義氣!」

除咗供緊買畀父母嘅村屋,原來林子善2015年仲買入咗東涌東環一個近300平方呎嘅一房單位,樓價逾400萬元,林子善畀咗27萬元印花稅,另由於壓力測試及職業問題,需要付出六成首期:「暫時計劃收樓之後會放租,或者等今年結婚時做新居。」又大呻:「爲咗供兩層樓我出盡九牛二虎之力,依家係窮人!」

4月婚宴 豪使百萬

35歲林子善由去年2月6日向Kary求婚成功後,籌備逾一年,直到今年4月將於將軍澳一間酒店筵開50席搞婚宴,期間豪使近百萬港元,林子善話因此要努力賺錢:「我同佢講『你想點就點,幾多錢話我知!』,一生人一次想佢最鍾意,我個人冇所謂!」

去年10月16日,林子善和Kary正式簽紙結婚,其後兩人就豪花十多萬到馬爾代夫拍攝婚紗照,再去泰國旅行。子善表示:「今次去咗四日三夜,一拍完新劇《果欄中的江湖大嫂》就起行,但因為陽光有限,所以時間好趕,仲忙過拍劇!」

甜爆放閃:「老婆要靚最緊要」

雖然婚紗照中林子善一身健碩肌肉勁吸睛,不過他就搞笑話:「請大家將注意力集中放在我漂亮的寶貝身上,在她身邊的男人只係窮到衫都冇得著而已!不需要有評論,我心裏她任何嘢都是最好的,正所謂『新人去影婚紗照,老婆要靚最緊要』!」

幫林子善影婚紗相的攝影師Jack Tang話在馬爾代夫拍攝時天氣時好時壞,令他非常擔心,幸好雨過後見彩虹,為子善帶來完美的婚照:「傳聞見到彩虹會帶來好運,祝福呢對好襯好夾嘅情侶!!之後全日影相都好天氣,真幸運!!」

摩天輪下求婚

去年2月6日在日本東京台場摩天輪下,林子善化身Kary最愛的卡通人物「阿拉丁燈神」,並將價值近20萬元的1.6卡鑽戒放在「神燈」中跪地求婚,令Kary感動爆喊,但仍慳家地質問子善隻戒指「點解買咁大隻?」跟住仲伸咗子善兩腳!不過事後Kary仍感動表示:「天寒地凍,呢個傻佬扮鬼扮馬,又扮派傳單,同班朋友攪呢件咁夢幻件事,真係好驚喜,我超鐘意!呢件心意我會永遠記住,LOVE U!」

林子善和太太Kary在去年10月16日註冊結婚,成為人夫的林子善與老婆鬼馬合照,被太太勾着鼻子走,原來喻意係聽晒老婆話!林子善留言話:「20171016之上路,有傻人終成眷屬,一起踏上婚姻之路。」其實近日忙於為新劇《果欄中的江湖大嫂》拍攝的子善,原來之前一晚仲通宵趕劇,瞓得咁少都抽空去註冊,與Kary正式成為合法夫婦,認真抵錫啦!

搵唐詩詠做「兄弟」

林子善同太太Kary4月將在將軍澳一間酒店舉行婚宴,大約筵開50席。林子善圈中出名人緣好,他自爆兄弟團人選,可謂粒粒皆星!有鄭嘉穎﹑馬國明﹑黃嘉樂﹑唐詩詠、黃嘉樂、黃長興同袁偉豪,佢仲透露唐詩詠當日會著西裝做「兄弟」!

婚禮請埋星爺

另外星爺周星馳可算係子善的啟蒙老師,那些年只有16歲的子善參加電影《喜劇之王》試鏡,有幸被星爺睇中,扮演黑社會角色「洪爺」出位,成功喺觀眾心中留下印象。子善揚言婚禮一定會請埋星爺,但都明白對方貴人事忙,未必會到。

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!

關鍵詞
林子善