睇戲十大最無癮行為！ 森美小儀於《早霸王》逐一盤點
撰文：東方新地｜圖片：新傳媒圖片庫
「行內人」睇《復仇者聯盟3》睇到火起
話說早前有位幕後的宣傳人員，睇完《復仇者聯盟3》後喺FB同大家分享，本來有得睇特別場當然好開心，但就被一位TVB男藝人破壞好心情！「一位自以為天王巨星的TVB男artist，從好多TVB前輩口中都聽過呢位上位中的小生態度非常差」，事主稱呢位男藝人未開場時已經用非常唔友善的眼神「睥」住佢朋友，到之後開場後佢食薯片，男藝人就用極差語氣同佢講：「你細聲點！」
自以為天王巨星的TVB男藝人
事主強調自己只係食薯片，絕無製造不必要的聲音，無傾偈亦無睇電話等行為，更寸爆叫呢位男藝人「自己包個戲院睇啦嘛，咁咪冇聲囉。」文章末段事主仍然氣憤難平，表示當日坐喺場內該範圍的都係行內人，「你要覺得自己有幾紅先會用咁冇禮貌嘅語氣同人講嘢？」
袁偉豪發文回應
該位宣傳人員雖然無開名，不過涉事男藝人之後主動喺FB發文講番件事，原來係袁偉豪！袁偉豪首先表示歉意，但強調冇用不友善眼神望人，而且解釋因為旁邊有人食nachos(玉米片)時包裝發出聲響，所以先輕聲喺其耳邊講句「唔好意思，可否細聲一點？」事主話食薯片，袁偉豪就話佢食玉米片… 不過唔係重點啦！
兩人版本唔同？
袁偉豪繼續講，指完場後旁邊一行人對佢連番指罵，似乎仲講晒粗口話佢「咁x巴閉」，又話一定會將件事擺上網云云。最後袁偉豪強調唔係唔俾人食嘢，不過希望觀眾可以為他人設想，食嘢時細聲一點！
睇戲十大最無癮行為！
袁偉豪「薯片風波」早排成為熱話，森美小儀喺《早霸王》中亦有提及，並討論咗一堆去戲院令人好無癮的事，包括：坐側邊嘅人成日出出入入、俾後面踢櫈、有人食爆谷食得好大聲等等，大家有冇遇過… 或者自己做過？
踢櫈！踢完又踢！
最無癮之首就由「踢櫈」奪得！對於屬於高人一族的森美，表示對咁係因為有啲戲院座位較窄，要翹腳先可以坐得晒，但翹得耐又要換吓姿勢，所以會唔小心踢到前排嘅櫈。雖然聽落事出有因，但專心睇緊戲突然被人踢一腳，有時一腳完又一腳，真係會令人極之難忍。
即場討論乞人憎
另外，相信唔少人都會遇過啲人即場討論劇情甚至係劇透，唔知點解有時情侶或夫婦都好鍾意在戲院內進行討論或講解！有網友更表示遇過以上情況，向對方反映，但俾人鬧返轉頭：「戲院有話唔俾人講嘢咩！」真係又無奈、又想打爆佢個頭。
同場有失控嘅小朋友
講到「同場有失控嘅小朋友」呢個情況，森美笑言自己曾有朋友帶囝囝入場睇Iron Man，結果一開場，小朋友就已經因為太驚係咁嗌走人。而森美認為小朋友失控又或者係咁發問的情況出現，都只可怪父母。
有人食好香嘅嘢
「有人食好香嘅嘢」，可能因為戲院真係唔少人食嘢，所以大家未算好反感，不過小儀就話曾遇過有觀眾外賣黑椒豬扒飯入場！森美則表示依家戲院增加唔少款式的熱食，而咖哩魚旦絕對係濃味之首，而呢啲食濃味食物的行為，佢自己還可以接受咁話。
情侶喺你前面親熱
情侶親熱，正常不過，喺戲院仲夠晒黑，不過唔該顧及前後左右觀眾的感受，尤其是單身狗如小編… 入戲院都係專心睇戲，要親熱就唔該轉場啦。
細細聲傾電話
小編都明白，有時睇緊戲可能會有唔聽唔得的電話，但可以的話就行出影院先講啦，無論你以為自己講得有幾細聲，坐附近的觀眾都一定會被你影響到。
開場前廁所大排長龍
老實講，次次喺戲院去廁所都會大排長龍，特別係女廁。為咗唔會錯過電影個開場片段，而家小編都會喺外面去定廁所先，費事要排一輪之餘，又避免錯過咗套戲任何精彩場面！
焗住坐第一二排
認真的說，如果太遲先買飛入場睇戲，要焗住坐第一二排都真係幾無癮。小編試過坐頭幾排，而成場戲可能太多近鏡，結果小編都好似只係睇緊啲演員個口講嘢咁，要望哂成個樣都好辛苦…
兩個扶手被人佔據
一個坐位兩邊扶手本來就係足夠的，但有時一個人入場睇戲，咁啱左右兩邊又有人坐之餘，又咁啱坐喺左右的人都用緊自己座位個扶手，搞到冇得用都幾慘。雖然又唔算太緊要的！
有人食爆谷食得好大聲
食爆谷有聲就一定難免，但有時可能大家食嘅爆谷時盡可能就放輕少少咁食，如果唔係食到不停發出好大「咯咯」聲，都會好影響其他觀眾觀看電影。
