民間特首辦年貨 發哥 獨家派祝福

最新娛聞

民間特首周潤發雖然貴為國際巨星,身家估計已達56億,但發哥卻勁親民,生活平實貼地,香港市民個個視他為偶像兼封做民間特首,野生捕獲發哥如同中獎咁開心,人人爭住同佢selfie;原來發哥同香港市民一樣,勁鍾意過農曆新年,今年亦留港度歲,日前發哥就出動辦年貨,談到新年願望,發哥更向本刊讀者獨家派祝福,祝大家狗年長長久久!身體健康!各位讀者收到晒,狗年一定全年行好運!

撰文:東方新地

圖片:新傳媒圖片庫

發哥:以前透支太多

雖然身家估計有56億,但發哥生活卻與物質從不掛鉤,沒有聘請司機,鍾意擠巴士,搭港鐵,茶記醫肚,生活簡單樸素,更被網民選為民間特首!年近歲晚,發哥近日亦趕辦年貨,同發嫂輪住去九龍城買定靚水果賀年。即使近日氣溫急降,但發哥仍堅持每朝keep住行山做運動,保持健康體態。發哥曾這樣說:「我嘅人生座右銘,就係開心同健康,但開心必須有健康做基礎。有好嘅身體先可以享受好嘅人生。以前我拍電影透支太多了,後來我漸漸明白:人生最大嘅錯誤,就係用健康換取身外之物,所以依家要補番。」

行山幾個鐘

日前,發哥一身運動裝出動,去八仙嶺行山數小時,之後駕車去海港城約朋友吃飯敍舊,雖然行山幾個鐘,發哥仍精神奕奕,毫無倦意,落車後急急腳去會朋友,被本刊記者捕獲,發哥更趁狗年將到,向本刊讀者拜年派祝福,發哥笑容滿面說:「祝大家狗年長長久久!身體健康!」

讚台慶氣氛好

出身自TVB的發哥,當年25歲已經演技爆發,由他擔演的劇集《上海灘》,至今仍令人回味,更是無綫最受歡迎劇集之一,雖然已經貴為國際巨星,發哥亦一直有留意娘家TVB節目及劇集,一年一度嘅無綫台慶頒獎禮,發哥亦喺屋企坐定定觀看,他對本刊記者大讚台慶氣氛好:「好好睇,好熱鬧呀!(係咪你心水?)個個都實至名歸!」

做快樂普通人

由香港影壇拍到去荷李活,發哥現時拍部戲片酬數千萬起跳,身家豐厚,錢多到使唔晒,而發哥每日卻只用幾百元,財政大權交給老婆陳薈蓮全權掌管,早於幾年前,發哥已經決定將整副身家捐出做慈善,用作幫助有需要的人。

錢只係暫時保管住

據知情者透露:「其實十幾年前,好多朋友都問過發哥,話佢賺咁多錢,諗住啲錢留畀邊個,當時佢已經好輕鬆咁話,啲錢唔係佢嘅,佢只係暫時保管住,嗰時真係唔明佢意思!原來佢一早就已經諗好晒,等自己將來離開之後,就將全副身家捐晒去做慈善!」

辦妥慈善基金

發哥一早看破財富:「我冇司機同助手,我理想就係做一個快樂嘅普通人。人愈成長,愈發現,人生中真正難嘅唔係賺幾多錢,而係點樣保持住一顆安寧嘅心!平凡開心咁生活!」早前發嫂受訪亦公開承認,慈善基金手續已經搞妥,發哥如此無私大愛造福人群,真係民間英雄!

讀者留言