江嘉敏拍《野外步出》玩飛索 失儀爆粗醜態盡現

撰文：東方新地 圖片：《野外步出》影片截圖、《Star Talk》影片截圖、江嘉敏IG圖片、東星圖片

江嘉敏打頭陣出洋相

無綫J2台節目《野外步出》首集由江嘉敏打頭陣勇闖東龍島，主持方紹聰(奶仔)為人活潑生鬼最識搞氣氛，沿途探問江嘉敏的工作趣事，二人本來相安無事，點知其中一個環節要挑戰懸崖飛索，江嘉敏竟在鏡頭前突然性真大變。早前奶仔聯同幾位女嘉賓一齊上《Star Talk》接受訪問，江嘉敏自爆在懸崖邊喊足個半鐘先肯踏出第一步。

江嘉敏爛口一面

節目終於出街，江嘉敏平時形象都唔係好，今次就加現晒形。抵達目的地後，江嘉敏單看教練示範飛索已嚇至腳震，奶仔成功飛越後，輪到江嘉敏出場，但她竟然想縮沙，擾攘一段長時間，在崖邊喊足個半小時才肯試飛，不過就由頭驚到尾，叫到斷氣都唔收聲，不停講「我唔得啦！」、「黐線」、「我唔敢」等，睇過條片就知江嘉敏把聲有幾煩，去到崩潰邊緣的她更加忍唔住問可唔可以爆粗，對住鏡頭大嗌：「好do高呀，我唔玩啦！」

江嘉敏半空吊繼續鬧人

踏出第一步後的江嘉敏又衝口而出大叫：「我收山啦，我唔拍劇啦！」劇組更狠心把她停在半空，令江嘉敏驚到花容失色，被半空吊將近10秒的她繼續鬧唔停，主持人與劇組都被她鬧勻，明知江嘉敏有畏高都安排她去玩飛索，一定係江嘉敏平時得罪人多稱呼人少啦！

方紹聰因網上節目受歡迎獲監製賞識開拍《野外步出》，自爆挑戰滑翔傘太興奮遭教練制止，江嘉敏玩飛索則崩潰大哭