法證先鋒5｜討論區爆有人買粉絲造勢時薪$65網民嫌出手低邊個咁有需要？

Nov 28 2022

無綫新劇《法證先鋒5》最近在中港兩地熱播，為搶收視日前安排一眾主要演員到商場出席宣傳活動，咁啱得咁蹺，有網民發現一張招聘圖，內容指到場舉牌支持演出者會有$130報酬，在討論區公開後即被透過日期及地點作人肉搜尋，竟然撞正是《法證先鋒5》的宣傳活動。網民以「邊個咁慘要買fans」為題引起熱議，而曾志偉新抱王敏奕亦有在自己的社交網呼籲粉絲到場，活動當日仲同粉絲影晒相，睇嚟唔似佢噃！

法證先鋒5 《法證先鋒5》由黃宗澤、蔡潔、蔡思貝、王敏奕、袁偉豪及洪永城主演，卡士陣容其實算唔錯。 — 《法證先鋒5》由黃宗澤、蔡潔、蔡思貝、王敏奕、袁偉豪及洪永城主演，卡士陣容其實算唔錯。（圖片來源：無綫劇照）

《法證先鋒5》繼續搞宣傳

無綫新劇《法證先鋒5》開播已兩個星期，觀眾反應好一般，可見《法證》系列不再是收視保證，無綫日前繼續為此劇搞宣傳，不過就發了小插曲。有網民在討論區以「邊個咁慘要買fans」為題發出帖文，並貼上一張Freelance Job招聘圖，時間是上周六(11月26日)4時半至6時半，地點是鑽石山荷里活一樓明星廣場，工作內容是請人去活動舉牌，支持演出者，仲要畀反應，講明唔可以遲到早退，完成後就會有$130津貼。

法證先鋒5 有網民上載一個Freelance Job的截圖上討論區，開題「邊個咁慘要買fans」。 — 有網民上載一個Freelance Job的截圖上討論區，開題「邊個咁慘要買fans」。（圖片來源：討論區截圖）

法證先鋒5 不少網民睇完個post回應人工只是65蚊一個鐘，出手太低。 — 不少網民睇完個post回應人工只是65蚊一個鐘，出手太低。（圖片來源：討論區截圖）

網民搵到王敏奕出po召喚粉絲

網民po完這張Freelance截圖，即有網民人肉搜索是哪個活動要人，最後搵到《法證先鋒5》的女演員王敏奕在IG出po上載上周六(26日)的宣傳活動細節，表明希望粉絲到場支持，而日期與地點都與freelance的內容完全一樣，即引起疑似《法證先鋒V》活動疑買粉絲，有傳媒就事件向無綫查詢，監制方浤酌回應未有聽過買粉絲一事，亦相信公司唔會買粉絲。