【流氓大亨重播】萬梓良狂做運動 踢走糖尿病

撰文：東方新地
圖片：新傳媒圖片庫

【流氓大亨重播】萬梓良 嚴格控制飲食

萬梓良在1988年憑電影《大頭仔》升呢金馬影帝，代表作有《流氓大亨》、《他來自江湖》等無綫經典劇。但早年萬子患上糖尿病，曾自爆暴肥60磅，血糖指數一度達15點多，但萬子勤做運動，配合良好飲食習慣，指數已回落至九點多，情況已有改善。佢仲曾經狂呻話老婆同個仔都監管住佢飲食，仲好搞笑引用自己慨名句：「以前我系飯桶，依家要等老婆配給幾匙羹飯，SoWhat！」

跑步睇中藥雙管齊下

近年萬梓良長駐内地拍劇，現居於廣州，人氣依然勁，佢話自己近年患上糖尿病，唔可以太瘦，會容易血糖低見暈，所以要keep fat先得，佢仲狂呻以前食得落三碗飯，但依家每餐只可以食三啖，同埋要食得好清淡。萬子又表示爲咗太太同兒子，現正積極跑步做運動以及睇中藥抗病，雙管齊下。

萬梓良早年曾被邀到寧波市演出，全場坐無虛席，身穿白色西裝的萬子當時肥到冇頸，連番獻唱〈上海灘〉和〈不再猶豫〉等名曲，新地網原創萬子當年勤做運動嘅短片，齊齊欣賞吓萬子的威風！

曾與恬妞結婚

萬子曾與女星恬妞88年因拍電影《大頭仔》撻著，之後仲合作過《他來自江湖》和《大家族》等劇，到92年萬子和恬妞結婚，更由無綫直播婚禮現場，但婚姻只維持了四年，就因性格不合而離婚。02年萬子迎娶比佢細17歲嘅武漢空姐郭明黎，03年誕下兒子萬大千，之後萬子就長居內地，拓展國內市場，鮮有返港。

去年復出拍港片

去年萬梓良因為被劇本吸引而復出拍港片《今晚打喪屍》，據知白只及張繼聰等一班年輕演員拍攝時都好似上堂一樣，經常向萬子哥請教！而繼《今晚打喪屍》後，萬梓良去年尾仲曾經同「King Sir」鍾景輝合作主演舞台劇《小井胡同》，佢話有咗糖尿病之後好容易見攰：「好在舞台劇時間比較固定，休息時間會多啲，如果系拍TVB劇就實頂唔順啦！」

《流氓大亨》經典場面

《流氓大亨》有唔少經典場面，最爆一幕當然係大結局時萬梓良對劇中昏迷嘅Do姐表白足足7分鐘，之後激動大叫「so what」非常震撼。肉緊嘅萬子邊喊邊講對白，尤其嗰行鼻涕最令人深刻，連星爺周星馳喺電影《喜劇之王》中都有重演呢幕！

萬子堅打吳啟華

另有一幕講述萬子出手打吳啟華，為求逼真，萬子事前並冇同吳啟華商量會真打，極度投入嘅萬子仲即席加插拎起個垃圾桶擲向對方，被真打嘅吳啟華事後堅嬲，最終萬子自掏腰包送古董表畀吳啟華賠罪。