袁偉豪

袁偉豪透露爸爸患癌:生命進入倒數階段

最新娛聞

廣告

袁偉豪近期兩劇連住播,繼《三個女人一個「因」》後又擔正新劇《棟仁的時光》,佢日前出席劇集嘅宣傳活動,講到劇情中佢要透過接吻偷取時間續命,經常處於生命倒數嘅最後30分鐘,佢感觸透露自己爸爸同樣處於生命倒數嘅階段:「已經搏鬥好幾年,係癌症,可以話係倒數階段,但都要去面對。」

撰文:東方新地|圖片:新傳媒圖片庫、袁偉豪IG

袁偉豪:有晒心理準備

袁偉豪透露爸爸五、六年前曾患上鼻咽癌,雖然醫番好,但之後到個肺有事,令身體每況愈下,依家已經到咗癌症末期:「爸爸身體已經承受唔到任何藥物同治療,依家唔需要住院,而係留喺屋企休息,媽媽日日照顧住佢。我同屋企人都有晒心理準備,自己可以做嘅就係唔好令佢哋擔心,盡量唔好將情緒帶入工作。」

講到新劇《棟仁的時光》,袁偉豪直言今次拍咗兩個幾月,係佢入行以來最辛苦嘅一部劇集:「永遠都係最早嚟、最遲走,搞到眼袋好似雞蛋咁大,聲未開就要埋位。」苦笑謂自己個殘樣好適合劇中呢個就嚟死嘅角色。

感激媽媽照顧爸爸

袁偉豪同屋企人感情要好,前年佢喺台慶攞「最受歡迎電視男角色」時,曾喊住多謝媽媽,亦曾喺訪問中講過以前每日出糧收到票,佢就會交畀爸爸幫佢儲起嚟,到佢要用錢時再問爸爸拎。

佢話媽媽依家要照顧爸爸好辛苦,付出咗好多,所以佢依家事業開始上軌道,希望自己可以成為屋企嘅經濟支柱,有咩都會義不容辭咁幫手。

去年袁偉豪嫲嫲過身,佢話雖然係104歲笑喪,但因為佢走時自己唔喺佢身邊,令袁偉豪覺得好遺憾,曾留言:「親愛的嫲嫲,我知道妳能夠活到104歲已經好叻了 ,十幾年前妳成日自己一個人周圍去,去拜神、自己好叻咁搭地鐵又搭巴士走遍港九新界,打麻雀又叻,碰牌又夠中氣。仲有我細個頑皮的時候又要我跪地主,掹耳仔,這些我一一都會記住,好遺憾我未能夠見到你最後一面希望妳喺另一個地方可以過得快樂,我會永遠都掛住妳,偉豪。」

細個係百壓星

依家袁偉豪外形good fit又靚仔,原來童年時佢又白又圓碌碌,仲係個百厭小魔星:「我以前好奀皮,3歲嗰陣有次喺屋企百無聊賴,咪跳嚟跳去玩吓囉!點知撼爆咗個唱片櫃,啲玻璃碎晒,背脊流晒血,最後仲要縫咗成6、7針,幾慘呀!條疤痕到依家都重喺度。不過,嗰次真係好感動,因爲媽咪係做sales嘅,返工要日企夜企已經好辛苦,但佢每晚放工就嚟醫院陪我瞓,你話媽咪幾錫我!」

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!