袁文傑

【深宮計】演太醫做奸角欺騙感情?袁文傑 兩年內娶女友張潔蓮

最新娛聞

廣告

大台熱播劇集《深宮計》去到第26集有新角色登場,之唔係「游生」袁文傑囉!佢之前拍多套無綫劇都係扮型男、暖男,今次終於試演奸角,佢飾演嘅文太醫唔止設計陷害周秀娜、馬國明有姦情,又迷暈娜姐企圖放火燒死佢,仲對相識多年、暗戀佢嘅徐相思(羅霖飾)與陸碧雲(張慧儀飾)加以利用,好衰呀!

不過,呢啲都係做戲咁做,現實生活袁文傑係暖男一名,對拍拖7年、人稱「Jackeline姐姐」的張潔蓮的感情始終如一,除了公開對女友講愛的宣言,還計劃在兩年內迎娶她,大家都等緊佢哋嘅好消息呀!

撰文:東方新地 |圖片:新傳媒圖片、TVB袁文傑Facebook袁文傑IG

袁文傑「文太醫」 奸到出汁

袁文傑在劇中飾演「文太醫」文可謙,今次是他首次於無綫劇集以古裝造型亮相,唔少網友大讚佢古裝造型非常帥氣又有壓場感!劇中他飾演的文太醫深得徐相思(羅霖飾)與陸碧雲(張慧儀飾)這對表姊妹的歡心,三人相識多時,多年後在宮內重遇 。

但其實文太醫已經唔係以前好善良的文可謙,他為了功名利祿而幫皇后胡定欣做盡壞事,仲欺騙感情㖭!

欺騙感情 左右逢源

負責管珠寶首飾的羅霖與管服裝的張慧儀本來已經和好多時,點知重遇多年前暗戀多時的袁文傑,而袁文傑看穿二人冧自己,同時為了上位,在中間從中作梗,搞到兩女再度成為情敵。

袁文傑憑霸氣「游生」爆紅

現年46歲的袁文傑喺亞視打滾多年,直至去年在無綫大熱劇《不懂撒嬌的女人》中,憑住霸氣「游生」一角爆紅!隨即工作機會大增,劇接劇、廣告接廣告,呢位身高188cm的型男成為風雲人物,無綫甚至邀請埋佢講波!

袁文傑張潔蓮拍拖七年

袁文傑爆紅,連帶其感情生活都備受注目,亦係呢個時候大家先知佢有個拍拖七年的女朋友,而且呢位靚女大家都認識,就係1995年落選港姐、人稱「Jackeline姐姐」的前無綫兒童節目主持張潔蓮!型男配靚女,襯到絕~

袁文傑:唔需要波瀾壯闊嘅愛情

袁文傑講過喜歡女友甚麼:「佢係一個好好嘅女仔,我未遇過呢種性格嘅女仔,佢好單純,相處得好舒服,唔使顧忌太多,到我呢個年齡嘅人嚟講,但求大家相處舒舒服服,唔需要波瀾壯闊、驚天動地,過晒嘞!呢刻彼此相處係最好時機。」

袁文傑:她亦如舊地默默在背後支持著我!

去年憑《不懂撒嬌的女人》游生一角人氣急升,仲喺去年台慶獲「最佳男配角」及「最受歡迎電視男角色」的提名,袁文傑在Facebook拉票之餘,不忘多謝女友:「有一個人,我一直想多謝。 以前我工作不多,而又醉心於網上電台講波,她十分支持我的興趣,追逐我的夢想;我喜歡阿仙奴,她會陪住我睇波;她不介意陪著我迫地鐵; 不介意陪著我食茶餐廳;現在我工作多了,但陪伴她的時間少了,她亦如舊地默默在背後支持著我!所以無論今次得獎與否,我都得到了很多額外的獎勵,最大的獎勵當然在背後的妳!而如果有幸得獎,希望可以將獎送給妳!」

互相欣賞對方有愛心

袁文傑同Jackeline在今年2月的《1+1的深情》擔任首集嘉賓,兩人都係黑白打扮襯到絕,言行舉止流露住甜蜜。主持田蕊妮問到兩人到底鍾意對方啲咩,袁文傑同Jackeline同樣都係答「有愛心!」

對方有咩缺點呢?

好啦問完鍾意對方啲咩,都要問埋佢哋覺得對方有咩缺點呢?Jackeline就覺得袁文傑有時候個人太靜,而袁文傑就覺得女朋友有啲小朋友,唔夠成熟!

透露相識經過

那些年袁文傑同Jackeline分屬唔同電視台,到底佢哋係點認識呢?袁文傑就笑說係非常老套的情節,事緣佢認識Jackeline的妹妹車車在先,車車打算將袁文傑介紹俾家姐識,於是將Jackeline的照片send俾袁文傑。

就係呢張相,袁生一直放喺手機,喂呀!Jackeline姐姐咁靚女,當然心動啦!

拍拖7年 未送過花

另外阿田又問到袁文傑有無做過一啲甜蜜舉動冧女朋友,但原來佢拍拖七年都未送過俾Jackeline!袁文傑好疑惑又壓低聲量咁話:「好似係你講過唔係必須送花…」Jackeline隨即回應:「必須㗎!」

袁文傑深情唱〈追〉

好啦既然一束花都未送過,呢晚袁文傑就為Jackeline送上驚喜!當晚喺中環摩天輪附近拍攝時,袁文傑突然出現喺一部流動展覽車上,在Live Band伴奏下深情唱出張國榮名曲〈追〉。雖然唔係話唱得好好聽,不過情深款款又有感情,Jackeline當然又驚又喜!

Jackeline姐姐感動落淚

聽多幾句,Jackeline仲忍唔住流下幸福的眼淚!

等了七年的玫瑰

拍拖七年都無送過一束花又真係差緊啲,袁文傑唱完〈追〉後向Jackeline送上一大紥玫瑰花,兩人再深情攬攬,成個畫面真係好感動!

Jackeline姐姐 曾經歷一段婚姻

18歲時曾參選香港小姐,隨即加入電視藝員進修班旁聽,入行前是幼稚園教師,所以簽約大台後主持兒童節目《閃電傳真機》可謂駕輕就熟。Jackeline姐姐曾經有一段婚姻,她在08年同拍拖13年的男友結婚,但3年後離異,不久便遇上了袁文傑,開始另一段愛情長跑,網民們都讚二人相當登對,希望早日聽到二人拉埋天窗的好消息!

兩年內結婚 被陳啟泰追問婚期

袁文傑去年底接受訪問時表示有結婚計劃,希望是兩年內結婚,本來他希望婚禮是簡單,但他補充說:「但我又曾經公開講過會搵陳啟泰、張文慈同蔡國威做婚禮嘅司儀,之前同啟泰食飯佢追問我幾時?叫我唔好甩底!佢嚴厲地逼迫我,我不能低調處理。」

袁文傑團拜攬女友放閃《殭屍II》飯局好齊人

袁文傑今年年初五約埋《我和殭屍有個約會II》的尹天照、張文慈、袁文傑、曾偉明同李潤祺等,殺上尹天照屋企團拜,一班老友難得聚頭,袁文傑喺網上貼合照,仲留言:「大年初五,又係時候跟照哥見下面,仲有阿祺,Ming Sir,文慈,去年因為工作,都少了大家的聚會時候,不過,又有何關係?」不過大家嘅目光,當然集中喺佢同Jackeline度啦!

「棄養動物係仆街!」

袁文傑的確是好有愛心的人,他非常喜歡小動物。早前他在《東方新地》Facebook跟網民live chat,回應網民問題時風趣又幽默,由當年《家有囍事》到愛隊阿仙奴都無所不談,反應極佳!但一談到動物問題時,一直笑容滿面嘅袁文傑即時變得嚴肅,呼籲養小動物嘅人一定要有愛心、關懷以及責任,之後更忍唔住大罵:「棄養動物嗰啲人係仆街嚟㗎!」另外又痛斥虐待動物嘅人。雖然用字係粗俗咗啲,不過睇得出佢真係好關心動物權益,所以網民也紛紛留言支持,又話佢好真性情!

唔食魚翅鵝肝

魚翅嘅製作方法殘忍, 袁文傑亦曾在Facebook share咗關於處理魚翅嘅影片,呼籲大家唔好食,因為「沒有求,也不需供了」。除咗魚翅, 袁文傑 前幾年都分享過世界反鵝肝日嘅資訊,佢就話:「沒有這樣兇殘的品味!弱肉強食的世界,要殺,但不要有折磨的過程,不要扭曲其天性!」

動物園囚禁動物殘酷

好多人鍾意去動物園,但係動物被人囚禁喺動物園其實係剝奪緊佢哋嘅自由。 袁文傑 就覺得動物園囚禁動物嘅行為好殘酷,我哋去動物園睇動物其實係好殘忍嘅事,只係大家觀念都扭曲晒,當咗係理所當然。

呼籲停止參與馬戲團活動

除咗被囚禁喺動物園嘅動物之外,馬戲團入面表演嘅動物更加悲慘,喺馬戲團精彩嘅表演背後,表演嘅動物受到慘絕人寰嘅虐待。 袁文傑 分享過一宗關於美國夏威夷馬戲團入面,表演嘅大象失控攻擊馴獸師致死嘅意外,佢認為造成意外嘅兇手其實係人類自己,呼籲大家停止參與所有馬戲團活動。

呼籲停止皮革象牙

袁文傑 亦都呼籲大家唔好買賣象牙同皮革,象牙傷害大象,而皮革品嘅製造過程更加係慘不忍睹。

支持領養不棄養

袁文傑 亦都好關注寵物,佢經常分享關於繁殖場嘅慘況,呼籲大家要領養而且唔好棄養寵物。

戒飲牛奶

袁文傑 亦表示自己戒咗飲牛奶,好多人都唔知原來牛奶嘅製造過程都好殘忍,袁文傑 仲話牛奶係牛飲嘅,對人類冇益處。只要係傷害動物做成嘅產品,袁文傑 一併拒絕,果然係愛心爆棚嘅暖男!

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!