許志安做探訪 畀老友記問感情事 「你以前係咪同XXX一齊？」

撰文：東方新地｜ 圖片：新傳媒圖片、許志安IG

許志安 去老人中心探訪

安仔早前去咗元朗一間老人院探訪公公婆婆，同行仲有三隻受過專業訓練嘅治療犬，佢話：「我歌迷會有義工團，以前都試過同歌迷探訪護老院，今次仲帶埋治療犬同行，原意係帶歡樂畀老人家，但其實都係治療緊我，因為我可以放下工作，比佢哋更開心。」

安仔當日為咗令公公婆婆開心，即場唱幾句粵曲助慶，又慢慢令本來唔敢接觸治療犬嘅老人家，主動提出餵狗狗食零食。

眾人閒話家常期間，期間有一位醒目嘅婆婆突然問安仔：「你以前係咪同鄭秀文一齊？」頓時哄堂大笑，安仔也笑住話：「依家都係喎！乜你咁八嘅，咁你知唔知羅家英同邊個？劉浩龍同邊個？沈震軒又同邊個？」

還有位老友記邀請安仔打麻雀，為免令認真打牌的老友記失望，最後安仔竟因棄糊變出銃，他說：「我一向冇賭運，剛才反而係咁自摸，我算用心良苦，為咗令佢哋開心，贏牌變輸牌，哈哈！」

安仔又話有義工、治療犬關心固然好，但只係錦上添花，家人嘅關心先係最重要！講得好啱！

許志安 潮玩wake surf

都話兩公婆結婚愈耐、外型越似啦，好似Sammi鄭秀文同許志安呢一對，結婚五年，安仔都被Sammi感染，愛上做運動，愈嚟愈fit、愈嚟愈潮，仲愈玩愈青春㖭。繼日前潮玩wake surf，曬完八舊腹肌，身體力行證明心境同身型都同樂壇班後生有得揮外，早兩日又見佢約咗友人在跑馬地食晚飯，大講大笑十足十後生細仔良朋相聚，cap帽短褲再襯對籃色波鞋造型亦都隨意得嚟好青春，喂，咁睇法，話安仔已經滿51歲，你信唔信先？

同朋友去跑馬地食西式簡餐，安仔好大方，食完嘢二話不說走去櫃枱負責買單。上個月啱啱生日51歲嘅安仔keep得fit，成身裝束又潮童一樣，邊似五字頭？

安仔話以前有演唱會先會狂操，平日做踢吓波，唔會太多操練，近年受Sammi影響，不會陪跑步，自己都keep住操肌，閒閒地都有六嚿腹肌同粗壯臂彎﹗

近來安仔愛上wake surf，無論晴天陰天都出海，難怪時刻保持年輕心態﹗