中年好聲音3｜21歲趙浚承曾戀18歲DaDa陳靜多張攬啜舊照曝光曾被指「奀星」

初出道DaDa認18歲愛趙浚承短暫戀曲情史重溫

趙浚承同初出道「百果園E神」曾有一輯親密照外洩，照片流出兩人仲各自大方認愛，喺娛圈掀起一陣熱話。

親密照外洩 DaDa毫無掩飾「我哋係拍過拖！」

2010年DaDa憑住傲人E cup事業線同甜美外貌，喺模特兒界同廣告圈急升為宅男女神。正當佢事業一帆風順，網上突然流出多張佢同零人氣組合SQUARE成員Gary（趙俊承）嘅親密照！照片入面，當年21歲嘅趙俊承唔單止攬實DaDa，仲有咀面珠嘅超甜畫面，羡煞旁人！當時記者致電DaDa查詢，佢竟然毫無掩飾，直認：「我哋係拍過拖！」

甩拖兩年短暫復合分手後仲係朋友

DaDa坦白話，佢同趙俊承喺2007年開始拍拖，雖然唔夠一年就分手，但到2009年又復合過一個月。佢話：「我好念舊，容易同前度翻撻，但同Gary分手係因為性格不合，而家我哋係朋友！」問到會唔會再同趙俊承復合，當年嘅DaDa語氣帶有保留咁答：「佢好孝順，又好錫人！（記者問：有冇懷疑係佢洩密照借你宣傳？）唔會，我信佢唔係咁嘅人！（再有機會復合？）唔知呀……」雖然DaDa話分手後做番朋友，但佢對趙俊承嘅讚賞同保留態度，已經畀外界無限遐想！

趙俊承回應：驚到呆晒！

相對於DaDa嘅爽快，趙俊承喺2010年7月28日一場首映禮上被問到親密照時，表現就略為失措！當時記者拎出照片追問趙俊承，佢先係呆咗幾秒，先傻笑回應：「……我同佢幾年前做模特兒時一齊，拍咗半年左右就分咗。佢係好女仔，但嗰時我哋重細，我唔識珍惜。」問到分手原因，趙俊承話係和平分手，但暗示DaDa嗰時比較貪玩：「佢唔係成日蒲，但有時會出去玩。我太關心佢，佢覺得我管得太多，咪分手囉！」

趙俊承急澄清：影床照嗰個唔係我！

講到復合可能性，趙俊承話：「佢人靚又好女，唔排除有機會！不過我而家專注事業。」趙俊承仲急急澄清：「同DaDa影床照嗰個唔係我呀！」似乎生怕畀人誤會同DaDa當年嘅床照風波扯上關係。雖然趙俊承當時人氣麻麻，但佢對DaDa嘅讚美同唔排除復合嘅口風，的確無損佢嘅暖男特質。

趙浚承 dada DaDa坦白話，佢同趙俊承喺2007年開始拍拖，雖然唔夠一年就分手，但到2009年又復合過一個月，影落唔少溫馨又親密照片。（圖片來源：東方新地@2010） — DaDa坦白話，佢同趙俊承喺2007年開始拍拖，雖然唔夠一年就分手，但到2009年又復合過一個月，影落唔少溫馨又親密照片。（圖片來源：東方新地@2010）

DaDa事業旺收入秒殺Gary

2010年DaDa同陳柏宇拍過百果園廣告，可惜當時形象太密實未有突破。直到同年3月轉簽模特兒公司，走性感路線後，佢即刻job接job，事業如日中天！相反，趙俊承所在嘅男團SQUARE雖然未解散，但工作量少得可憐，四位成員半年總收入加起來，都唔夠DaDa三個月嘅收入！有傳DaDa當時收入比趙俊承高出100倍，難怪被指「女神啜奀星」！

趙浚承 dada 喺2010年7月28日一場首映禮上被問到親密照時，表現就略為失措！（圖片來源：東方新地@2010） — 喺2010年7月28日一場首映禮上被問到親密照時，表現就略為失措！（圖片來源：東方新地@2010）

趙浚承 dada 當時記者拎出照片追問趙俊承，佢先係呆咗幾秒，先傻笑回應，團友都表示十分好奇。（圖片來源：東方新地@2010） — 當時記者拎出照片追問趙俊承，佢先係呆咗幾秒，先傻笑回應，團友都表示十分好奇。（圖片來源：東方新地@2010）

趙浚承 dada SQUARE有「港版飛輪海」之稱，幾位團員見到親密照都十分八卦爭相傳閱，令到趙俊承好尷尬。（圖片來源：東方新地@2010） — SQUARE有「港版飛輪海」之稱，幾位團員見到親密照都十分八卦爭相傳閱，令到趙俊承好尷尬。（圖片來源：東方新地@2010）

08男團SQUARE 港版飛輪海出道即沉寂

講到SQUARE，呢個2008年出道嘅四人男子組合，有「港版飛輪海」之稱，由何尚謙（James）、趙俊承（Gary）、何浚尉（Rex）同李柏煥（Brian）組成，係江若琳嘅師弟。雖然出過一張專輯，但出道3年，唔單止四位成員連名字都未畀人記熟，甚至連組合名都無乜人聽過，工作量低到近乎零人氣，喺娛圈可謂「邊緣化」嘅代表。