陳智燊首度公開囝囝正面照 笑問呀仔似邊個多啲？
撰文：東方新地｜圖片：Instagram
陳智燊首度公開囝囝正面照
陳智燊今日喺個人社交網首次分享兩張B仔相，並留言問大家「BB似邊個多啲？」，而Jason就認為呀仔對眼仔就似媽咪，鼻同嘴就似自己多啲，至於對耳仔Jason就先唔公開，仲叫大家估下B仔對耳仔似邊個多啲喎，認真鬼馬！
Jason同時晒出一張呀仔帶住腳帶嘅相，留言話「我們會一直牢記2018年，由二人變三人家庭一年。我哋依家有咗一個屬於我哋嘅囝囝，又或者好似腳帶所指’是屬於Sarah’哈哈哈」
網友睇到B仔個樣後，除咗大讚B仔勁可愛之外，唔少人都認為BB似太太宋熙年多啲！不過同時亦有人想快啲知道B仔叫咩名喎，唔知Jason又會幾時公布俾大家知呢？
宋熙年嘆：懷孕只係呢條路嘅開始
佢話明白做媽媽嘅路，唔係好似喺公園散步咁簡單，而係好漫長嘅路，而懷孕也只是這條路的開始。她說產後這幾個星期好有挑戰性，雖然佢為餵人奶及不眠不休照顧BB做好心理準備，但原來仲有好多生B前未預計過嘅問題都陸續出現，包括產後腫脹、抑鬱情緒、賀爾蒙失調及傷口恢復等等。雖然要面對好多問題，但只要抱住BB，老公又攬住自己嘅時候，一切都值得！
6磅B出世 母子平安
8月31日陳智燊宋熙年同時更新IG，原來佢哋嘅愛情結晶「Boss baby」，已經出世喇！Sarah PO咗一張Jason抱住BB嘅相，慈父相表露無遺！
同時Jason就PO咗一樣同BB頭貼頭嘅相，個樣勁冧，仲話好多人都話個仔同佢似樣，咁即係大個都會係一個靚仔啦！
新手爸爸Jason今日受訪時表示，心情好興奮。上個星期老婆仲係大住肚，BB而家出咗世，成件事唔知點去消化，覺得好得意、好神奇！而佢亦都有陪老婆入產房，過程好順利！
BB尚未改名
報導指，Jason仲喺醫生傍住之下，幫囝囝剪臍帶！佢話當時好似剪綵咁，醫生仲叫佢影咗相先！剪完BB仔冇事，佢自己都冇嚇親。Jason覺得BB瞓覺個樣好甜，好似媽咪，不過朋友就個個話BB 似爸爸。
想再追一個女
「Boss baby」而家就仲未改名，但已經同媽咪一齊返咗屋企，兩個都食得瞓得！Jason話Sarah想再生多個女，嚟緊佢哋會再好好計畫吓！
長胎不長肉 陀B宋熙年孖老公拍寫真
懷孕7個月的宋熙年目前停工安胎，日前佢同老公陳智燊拍攝大肚寫真，Sarah於社交網站分享照片及留言：「Our precious family of three…」二人期待BB出世，Sarah表示懷孕是神奇的旅程，相當享受每一刻。
Sarah換上多個造型，其中一款着上黑色衫同短褲，見佢個肚籮咁大，但手腳依然纖細，面部未見浮腫，真係長胎不長肉，令不少孕媽羨慕呢！
Jason都有幫太太影花絮照，見Sarah喺鏡頭前擺出搞笑甫士！
宋熙年陳智燊宣布升呢做爸媽
宋熙年陳智燊今年4月喺社交網站發佈喜訊，表示陳氏家庭即將迎來新波士！
Jason要好好錫老婆呀！
Jason喺宣布喜訊前，先送上一段愛的宣言～
現年40歲的陳智燊(Jason) 與32歲前華姐宋熙年(Sarah)於2016年結婚，婚後一直幸福美滿，經過兩年的二人世界後，今年終於傳來喜訊！
陳智燊宋熙年拍拖7年，愛得甜蜜，不時被催婚，終於在2015年暑假，忙於拍劇的Jason特意「即日來回」澳洲，趁Sarah與家人慶祝生日時，送上鮮花及親自設計的鑽戒求婚，讓Sarah驚喜萬分。2016年，兩人在英國東薩塞克斯郡的Buxted Park Hotel完婚。
兩夫妻接受無綫節目《東張西望》訪問時，Jason表示愛妻宣言要讀多次才抱得美人歸，「要求高到不得了，要一隻隻字好有愛讀出嚟，嫌我講得太慢，要快啲，結果講咗兩、三次先收貨。」
宋熙年 爆陳智燊勁緊張
陳智燊和宋熙年閈早前以夫妻檔出席新車發布會，兩人笑言已經準備咗好多迎接BB嘅嘢，又表示唔介意用二手嬰兒產品，講番剛開始知道懷孕時嘅心情，兩人都話好無助：「因為未夠三個月，唔可以話畀任何人知，唔可以問其他人。」所以當時陳智燊都是依靠網上嘅資訊來照顧老婆。
宋熙年又透露胎兒性別係男仔，仲話雙方父母對抱孫都覺得好開心，不過陳智燊就笑言：「我呢邊都係兄弟，父母比較想抱孫女！」
而問到老公係咪特別緊張佢懷孕嘅狀態，宋熙年甜笑指：「佢每個小時都講三次，叫我小心、小心、小心，唔能夠食啲咩嘢咁。」
孕媽宋熙年 準備充足
今個月，孕媽宋熙年就趁住懷孕進入穩定期、個肚又未至於太大，同老公陳智燊一齊飛咗去毛里裘斯，爭取機會再享受吓二人世界先！
陽光海灘、水清沙幼，又大住肚做緊女皇，孕媽媽好有興致影咗好多靚相擺上網，仲見到佢個肚剛滿四個月，已經睇緊育嬰書做定功課㖭！其實唔止呢樣，宋熙年仲話已經請咗陪月，真係準備功夫做到十足。
著波鞋出巡
孕媽宋熙年陀B亦份外小心，平時出job有助手、出街有老公傍實，呢日去超市上糧，就有外傭跟實，宋熙年揀完肉又揀菜，之後又親自揀靚生果，睇嚟都係入開廚。最最最緊要係呢日好聽話，著番平底鞋，緊張老公陳智燊就倍感安慰喇！
日前兩公婆齊齊飛去毛里裘斯享受二人世界，除咗微微隆起的四個月肚，宋熙年手腳纖幼keep得好fit，仲呃到人。
新手媽媽係緊張啲，就算放假都要抓緊時間溫吓書睇定育嬰指南。
