隱形戰隊｜學生妹造型靈感來自野田妹 林凱恩預告角色下場悲慘

先說造型，林凱恩的學生妹造型雖然滿臉痘痘，但由於傻更更又帶點純真害羞，入屋度高。學生時期已是大力頭號「迷妹」的詩婷，曾當眾向大力示愛，可惜因臉上暗瘡慘遭還未懂事的同學們取笑；當時滿臉委屈的Iris喊得楚楚可憐之餘，演技亦十分自然；網民大讚她的眼鏡Look可愛，角色設定亦很新鮮。

除了學生妹造型，疑似捲入神秘組織及有吸毒惡習的詩婷，不時會被指示作性感打扮及濃妝亮相，與平時侍應的清爽有禮Look截然不同。另Iris角色遭遇亦甚有故事性，更會與郭子豪有一段刻骨銘心的愛情故事。

談到詩婷這個角色，Iris坦言有難度：「今次角色最大挑戰，係要將馬詩婷呢個悲劇人物經歷嘅所有嘢，喺短短幾集表達晒出嚟，既要畀人感受到佢遇番以前愛人嗰種喜悅同夢幻，亦都有好多其他唔同程度嘅複雜情緒要處理，所以要事前做好多功課。」Iris續指單是學生妹造型，已花了不少心思：「我自己最鍾意學生Look，因為同以往嘅靚女造型唔同，想做到一種宅女迷妹嘅感覺，事先都參考咗好多唔同角色，好似野田妹，造型上係特登設計得老土少少同埋化多啲痘痘，令到馬詩婷感覺更加冇自信。」