馮盈盈出post搵真銀成吸金女王江嘉敏使橫手狙擊

Nov 30 2020

因疫情令收入大減，不少藝人轉戰網上市場求生，在社交網擁有41萬followers的馮盈盈便是其一，近月更成了各品牌的新寵兒，據知馮盈盈出post價高達10萬，在疫市中收入相當和味，而昔日好姊妹江嘉敏，社交網的followers比馮盈盈少8萬，但身價卻相差十倍，被死敵馮盈盈遠遠拋離的江嘉敏出招狙擊對手，誓要同馮盈盈撼過﹗

文：東方新地圖：馮盈盈IG、江嘉敏IG、李佳芯IG

馮盈盈就算忙於拍劇，仍不時在社交網開live跟粉絲交流，日前趁lunch，直播自己食素，全妝上陣，相當認真﹗

馮盈盈搵到搬豪宅

疫情令娛樂圈成重災區之一，過去大半年藝人們靠商演、品牌活動等搵真銀的機會近乎零，藝人為另覓財路，紛紛轉型KOL，出post搵真銀，在社交網擁41萬followers的馮盈盈，向來活躍於社交網絡又敢言，儲落一大堆年輕粉絲，人氣旺唔使講，加上她挾住港姐冠軍銜頭，又畢業於香港大學食物及營養學系，深受健康食品及護膚品牌喜愛，據知馮盈盈出post價由5萬到10萬元不等。

馮盈盈近來搬往將軍澳海景四房豪宅，被指財來自有方，實質是馮盈盈跟家人同住，故租住大單位。

馮盈盈威脅李佳芯

馮盈盈近日被指突然富貴，搬無敵海景豪宅，拎親都H字的包包，被質疑財來自有方，馮盈盈霸氣回應指全身都是自己賺錢買，絕對行得正企得正，而緋聞男友鄭衍峰亦為她護航，爆馮盈盈出一個post都足以買到幾個名牌袋，可知馮盈盈吸金力幾強勁，唔止出post搵真銀好和味，人氣持續高企，在網上人氣竟威脅到人氣王李佳芯，為保住財路，有傳李佳芯不惜將出post價由10萬降至6萬，希望保住自己的競爭力，不被如馮盈盈等後起之秀盡飯碗。