馮盈盈再度語出驚人 節目中透露第一次約會有幾濕？！

撰文：東方新地｜圖片：電視截圖

馮盈盈心跳回憶之第一次約會

《後生仔傾吓偈》搵嚟貼地爆肚達人馮盈盈，高智慧抽水王麥明詩，同埋要幫佢兩個兜嘅陸浩，呢個3人組真係配合得天衣無縫！最近，節目講關於「人生的第一次」嘅話題，而出哂名嘅爆肚王馮盈盈就喺節目中再次爆肚，講返第一次約會嘅情況！

首先，馮盈盈就個話題搶先話自己記得當年第一次嘅約會，聽到咁，好奇心極重嘅陸浩就緊係追住嚟問佢問題啦！

結果，馮盈盈爆響口話自己初戀係19歲，之後開始講番自己首次約會嘅情況，提到當時約會嘅時候都仲未係男朋友。

馮盈盈第一次約會「濕晒」

馮盈盈可能回憶緊第一次初戀約會嘅回憶，愈講就愈緊張，愈嚟愈就口窒窒咁，仲話約會當晚就一齊咗，然後就拖手，話自己睇落表面好似好平靜咁，但實際內裹就好緊張，所以勁多手汗！佢仲話：「到隻手啲汗已經滴緊落地下。點知要拖手喎，真係想死。」

馮盈盈話：「嗰陣已經係抹乾晒都繼續濕嘅程度，搞唔掂。」聽落咁都真係幾嚴重下。

濕完又乾，乾完又濕嘅馮盈盈，就繼續停唔到口咁繼續講落去自己對手有幾濕嘅情況。

麥明詩智慧抽水

聽到呢到，麥明詩終於忍唔住口要抽一抽佢水，講番句：「總之我聽到你係咁濕啦…」

被麥明詩乘機抽咗一下水嘅馮盈盈就緊係唔尷尬啦，繼續講：「濕晒，個地下都濕埋，點知佢拖完就話好濕，我話係呀，我掂到男仔手就會緊張。但係嗰刻佢好浪漫，話唔緊要無問題我鍾意。」