高海寧

高海寧:封胸有得有失

藝人專訪

廣告

高海寧雖然出道以來一直以身材為賣點,「咪神」形象深入民心,但佢近年刻意收起性感,希望大家唔好過份注重係佢身材上面而忽略佢演出嘅努力,雖然「封胸」導致佢少咗工作機會,但係佢就話唔介意有一段時間可能會失去一啲job或者角色,因為唔跨過,永遠都唔會有進一步嘅路、行得再遠啲。

撰文:劉倬延
攝影:Issac
場地提供:Marble
服裝提供:Michael Kors

唔介意封胸失去一啲job

家人有無介意你行性感路線?

對於我爹哋媽咪嚟講,我永遠都係佢哋個女,佢哋冇介意過我行性感,因為佢哋知我唔係一個大家外表上望到嘅女仔,因為性感呢個形象可能令好多人誤會我係壞、私生活唔檢點,或者鍾意釣金龜,但我爹哋媽咪好清楚我係一個點嘅女仔,我亦都用行動去證明畀大家睇我係一個點嘅女仔。所以當我遇到奇怪嘅新聞,我爹哋媽咪會同我講:「阿女唔使理,做好自己,遲早有日會睇到嘅!」當出面遇到好多壓力,淨係得屋企呢個地方令我最舒服。

高海寧
上月,高Ling為爸爸慶生。

大家都將注意力放喺你嘅身材上,你覺得有冇壓力?

當然有啦,我得到大家嘅注意力,諗起高Ling就諗起性感,但亦同時間限制咗我嘅演藝生涯好多、好多年,近年因為田蜜(《不懂撒嬌的女人》)或者《使徒行者》,一啲好嘅角色令到大家對我印象開始扭轉,監製開始會畀機會我,畀啲重戲份啲或者有得發揮嘅角色畀我,好衷心多謝佢哋。

大眾將我同白健恩嘅強姦戲放大,在於我嘅立場,我梗係唔開心啦,嗰套劇之前我好多角色都係客串小三、狐狸精,監製同我講佢睇我嘅飲食節目,見到我講起婆婆嘅一段說話,feel到我內心有其他嘢可以畀人發掘,所以願意畀機會我,但外界只會將性感放到好大,所以我嗰套劇所有嘅努力都比嗰場戲冚晒。就係嗰刻我開始諗係咪要收起性感。

擁有34D魔鬼身材,入行多年一直被派演花瓶及性感角色,對被標籤為性感,「如果你讚我呢套戲做得好,我會開心啲囉!」
擁有34D魔鬼身材,入行多年一直被派演花瓶及性感角色,對被標籤為性感,「如果你讚我呢套戲做得好,我會開心啲囉!」

收起性感後,成效係點?

有好多唔同嘅聲音,有人會話:「大家都覺得你係性感嘅,依家好多女仔都願意性感去引起人注意,點解你要收起啫?你會少咗好多工作機會。」但我覺得每個人都會有個階段,下年係我入行第十年嘞,我知道性感可以令我得到好多工作機會,但我希望我可以跨過呢個階段,去下一個階段,得到唔好再咁性感嘅工作機會,我唔介意有一段時間我可能會失去一啲job或者角色,因為唔跨過,永遠都唔會有進一步嘅路、行得再遠啲。

高海寧:封胸有得有失

選港姐患抑鬱症

08年你選港姐落選,但無綫簽你做藝員,算唔算賽翁失馬,焉知非福?

嗰陣選完都迷茫嘅,因為唔知自己究竟想要啲咩,當時公司畀咗offer我,我係好開心嘅,起碼呢條路我仲有得選擇行落去。都有同屋企人討論過,因為我書未讀完,未讀完大學,當時諗不如趁後生試咗先,就簽咗,都好好彩,即刻就有好多飲食節目、旅遊節目畀我拍,當時比較少拍劇,對於嗰個年紀嘅我易handle啲,因為演技需要時間、需要人生嘅一啲經歷先會易上手啲,玩、食對一個廿零歲出頭嘅女仔嚟講會easy啲,所以當時都好enjoy,做做下就做咗咁多年嘞。

最大喜好是瞓和食,加上體質易胖,會以瑜伽、跑步及健身keep身形,「依家會搵教練train,因為依家講求firm、少少馬甲線、pat pat要翹啲。」
最大喜好是瞓和食,加上體質易胖,會以瑜伽、跑步及健身keep身形,「依家會搵教練train,因為依家講求firm、少少馬甲線、pat pat要翹啲。」

會唔會成日諗番如果十年前選美嗰陣,邊個環節表現唔同,賽果都會唔同?

我參選嘅時候其實壓力好大,因為有好多負面嘅新聞,但當時因為細個、唔識得去處理呢方面嘅情緒,就會覺得點解全世界都唔鍾意我呢?所以喺選嘅過程中,我係曾經患過抑鬱症,我試過突然間肥咗好多,每日不停食嘢,困自己喺屋企喊,仲要唔想畀爹哋媽咪知,因為係媽咪叫我參選,佢見到我咁,都好唔開心,我喺沖涼嗰陣喊,因為肥咗好多,每日起身又要跑步,有好多情緒上嘅嘢,當時處理得好差,淨係想快啲選完,覺得係一個解脫,我的確冇選中,選完我見到好多姊妹喺後台度喊,但係當時我冇喊,當時嘅反應就係:「終於都完咗嘞!」覺得我終於都完成咗呢件事,所以你問我覺得賽果點,或者當時希唔希望自己有好好嘅表現,我覺得全部都係整定,我唔會諗番話如果攞到冠軍就好嘞,反而我係由低做起,一步、一步,成長到依家,每一步經歷嘅嘢,都係有得著嘅。

全副身家得六百蚊

有無捱過麵包同經歷低潮?

梗係有捱過麵包啦,話你聽一個秘密,諗番都對徐淑敏唔係咁好意思,當時(09年)佢結婚,我啱啱選完港姐,我戶口真係得番六百蚊,佢請我去飲,我都知道人情其實大概要一千至千五蚊,但我真係得六百蚊,我將我成副身家畀晒佢做人情,當然佢唔會話我畀得少,但我心入面知道係好少,我都有試過捱,因為啱啱選完港姐,收入係好低、好低,都係靠爹哋媽咪幫補吓,但我都唔想靠佢哋咁多,因為佢哋都壓力大,我仲有兩個細佬,我爹哋媽咪又要供樓,佢哋喺女人街做嘢都辛苦,所以嗰時問我夠唔夠使,我都話我OK呀,都盡量慳,嗰時搭地鐵,盡量將使費減到最低。

對有份演的《賭城群英會》被網民評為膠劇,「我又唔覺得膠,每個演員都做得好好,我好開心阿佘(佘詩曼)教我好多,佢好錫我,畀好多鼓勵我,做做下戲情緒冇咗,佢係會加啲對白幫我,識到佢我好開心。」
對有份演的《賭城群英會》被網民評為膠劇,「我又唔覺得膠,每個演員都做得好好,我好開心阿佘(佘詩曼)教我好多,佢好錫我,畀好多鼓勵我,做做下戲情緒冇咗,佢係會加啲對白幫我,識到佢我好開心。」

外界覺得我無經歷過低潮,其實我覺得我好彩嘅,我入咗行之後,因為去咗《美女廚房》個trip,開始好多客戶搵我做嘢,贏得知名度同好多工作嘅機會,但都有好多係我失去咗嘅嘢,例如我需要用更加多嘅努力先可以證明畀大家睇我有嘅唔止係身材,呢樣係我到依家都仲喺度fight緊嘅,個角色有少少性感,我所有嘅努力就冇晒㗎嘞,大家淨係會睇到我泳池嗰場戲係點,其他無論點努力去演繹喊戲、傷心各樣嘢,冇人會睇到㗎!呢個就係有得必有失。

運動以外,亦有學做戲、及學唱歌增值。
運動以外,亦有學做戲、及學唱歌增值。

愛情重要過錢

你兩年前成功買樓「上車」,負擔重唔重?

好重呀,壓力會大㗎,買樓呢樣嘢係我阿媽由細到大灌輸我嘅一個思想,因為我唔識投資,買磚頭好似係最穩陣,我媽咪爹哋後生好辛苦咁捱,都捱到兩層樓,所以當我有錢,我就儲首期買樓,開頭好想買大屋,大家一齊住,後尾發覺「上車」愈嚟愈難,惟有買間細先,好彩我兩年前做咗呢個決定,依家樓價又升咗嘞!想快啲供完,或者儲筆錢再買多間,要有動力嘛!

高Ling 在2015年買入油塘一個新盤單位,上年終於由買家變業主,正式收樓,佢仲與家人一起興奮晒V!恭喜晒!
高Ling 在2015年買入油塘一個新盤單位,上年終於由買家變業主,正式收樓,佢仲與家人一起興奮晒V!恭喜晒!

有傳你受殼王陳國強、王晶得寵後失寵嘅傳聞,你用咩心態面對?

除咗呢啲新聞之外,有時啲連個人物都冇,得個剪影,就話我畀富商A搞掂咗,我心諗你都畀啲誠意吖,得個黑影都可以作篇新聞,開頭我好介意,因為我好清楚我係幾咁腳踏實地嘅人,我亦都唔係貪錢嘅人,到話晶哥好錫我,晶哥係有畀好多機會我,我會唔會因為呢啲新聞而唔要呢啲演出機會?我唔會,因為我拍劇嘅機會唔多,所以每個角色我都做好佢,至於同公司老闆嗰啲傳聞,其實由頭到尾冇人影到張相,我同佢嘅接觸,都係每年台慶,佢喺台上,我喺台下,連打招呼嘅機會都冇。

不介意被指跟《恐懼鬥室》中的Billy撞樣,更因而被主題樂園邀請以Billy妝拍廣告,「我冇介意話我似,我反而覺得得到呢個機會賺咗。」
不介意被指跟《恐懼鬥室》中的Billy撞樣,更因而被主題樂園邀請以Billy妝拍廣告,「我冇介意話我似,我反而覺得得到呢個機會賺咗。」

被指同音樂人鄧智偉秘戀3年,係咪認定咗大家?

我可以講我依家嘅生活係開心嘅,因為多咗人support,心態唔同咗,我廿九歲嗰年突然間覺得,點解我好似未真正生活過,因為我身邊嘅朋友開始結婚、生仔,我開始檢討自己,我廿一歲入行,我入行後嗰八年,完全係工作,未試過好好enjoy拍拖係咩一回事,我好想做一個真真正正嘅人。

我信緣份嘅,我亦都係信感覺嘅一個人,我好渴望嗰種觸電嘅感覺、愛情嘅感覺,有句說話「你鍾意喺寶馬入面喊定踩住單車笑」我會揀坐喺單車後面笑,你畀好多錢我,但未必會喺身邊陪伴我,我係唔得嘅,我好需要溝通、陪伴,好enjoy做小女人,我爹哋媽咪到依家都好sweet,拖住手食飯,呢樣嘢好影響我,所以我憧憬好美好嘅婚姻生活,感覺、愛情對我嚟講係緊要過任何嘢,如果佢好愛我,我又好愛佢,我係唔介意一齊去捱。由細到大,我都鍾意好成熟嘅男仔,爹哋媽咪保護得我好好,變相唔係好識點去處理人際關係,我希望我另一半可以教識我好多嘢,我會好崇拜、好倚賴呢個人,畀我感覺無論遇到咩事佢都可以幫我孭上身、幫我解決。

去年高Ling不避嫌以低胸露背裝現身鄧智偉40歲生日派對。
去年高Ling不避嫌以低胸露背裝現身鄧智偉40歲生日派對。

你有冇結婚生仔嘅時間表?

細個覺得22歲結婚,25歲生BB,我好鍾意小朋友嘅,依家就覺得我一定會結婚嘅,我係結婚之後重心會擺喺屋企嗰啲女仔,一定會生BB,會畀心機照顧我嘅丈夫同小朋友,但幾時就順其自然,發生嘅時候我會同大家講。

你咁享受拍拖,點解唔公開?

我覺得拍拖係兩個人嘅事,或者係兩個家庭嘅事,但當我哋係公眾人物,好多嘢都要喺鎂光燈下面,我唔希望有其他任何嘅壓力去影響,呢個係兩個人嘅共識,到係時候、有好消息,我會接受大家嘅祝福。

高海寧:封胸有得有失