麥雅緻 張頴康 為女搞公主派對|囝囝都扮成小王子!
廣告
成日話十隻手指有長短,舊年10月,麥雅緻為老公張頴康追到個仔,湊成好字,自然孻仔孻心肝,不過呢個說法套用唔到喺張家度喇,細仔出世絕對無動搖大女小豆(張雅喬) 喺父母心目中嘅地位,最近小豆4歲生日,爹哋媽咪就為佢搞咗個以公主為主題嘅生日派對,壽星女當然好開心啦!
出場嘅時候有一個小插曲,主角小豆戴上皇冠同公主裙出場嗰陣,開心到不時轉圈,點知就被媽咪取笑,話肥美公主出場喇,其實小豆面圓圓、又有肉地咁,應該係最得意公主至啱!
有公主點會冇王子,呢個重任交畀細佬小花生(張迅橋),一個公主一個王子,父母對姊弟無分彼此都係咁錫。
麥雅緻張頴康抱住壽星女影張相先,小豆笑得幾甜!
生日會現場有大量吹氣波波,戴住公主皇冠、頸鏈同公主長裙嘅小豆,乖乖影張指定靚相先,父母為壽星女準備咗兩個蛋糕,都係公主嚟㗎!
現場仲有吹氣城堡㖭,一家四口笑容一致,幸福滿瀉!
為囡囡小豆扮成公主,麥雅緻都精心為囝囝打扮成王子,兩姊弟襯成一對!
睇住兒女成長,父母都感慨小朋友大得太快,眨吓眼小豆就4歲,麥雅緻張頴康每年都會同佢搞生日會,錫到燶!
小豆真係好鍾意公主,之前扮Belle,Beast個角色就畀細佬效勞喇!
開生日會預祝生日後,到正日喺屋企再切蛋糕,簡簡單單但快樂滿足!