黃嘉樂留鬚演出大突破 「暖男型」江湖大佬獲激讚
廣告
無綫劇《果欄中的江湖大嫂》今個星期進入結局篇，黃嘉樂飾演的陳政勇慘被殺死，搞到兩位靚女江嘉敏及馮盈盈為佢哭得死去活來！一直被封「御用細佬」的黃嘉樂今次留鬚演江湖大佬，造型大突破之餘，演出霸氣與柔情兼備，獲不少觀眾激讚！
撰文：東方新地｜圖片：Instagram、劇集截圖
黃嘉樂於《江湖大嫂》慘死
《果欄中的江湖大嫂》中，作為前江湖大佬的黃嘉樂，幾經辛苦先可以同乖乖女江嘉敏成為戀人，不過之後佢卻為救女友而被死對頭李天翔殺死！
江嘉敏 馮盈盈鬥喊功
之後劇情講到馮盈盈去認番哥哥條屍，雖然盈盈演出經驗未算多，不過今次喊戲表現亦算不俗，睇到人好心痛！
「暖男型」江湖大佬
黃嘉樂今次喺《果欄中的江湖大嫂》純屬客串，只係短短出場六集，不過就令唔少觀眾對「勇哥」呢個角色留下深刻印象！首先嘉樂一改形象，留咗濃密鬍鬚扮演江湖大佬，不過呢位大佬既有霸氣亦有柔情一面，對女友江嘉敏同妹妹馮盈盈溫柔萬千，可謂一個「暖男型」的江湖大佬！
留鬚man爆
現年39歲的黃嘉樂入行多年，雖然一直未有咩代表作，但其實佢條件都相當唔錯，身高182cm，外表俊俏有型。之前黃嘉樂造型多是斯文靚仔，不過留鬚後佬味十足，眼神帶點憂鬱，加上角色勁有暖男feel，女觀眾們睇到心心眼！有唔少人仲覺得佢同關楚耀好似樣？
以往黃嘉樂俾人感覺都係青靚白淨、官仔骨骨，唔知大家鍾意佢邊一個人style多啲呢？
無綫「 御用細佬 」
黃嘉樂雖然差唔多40歲，不過長得青靚白淨又帶點稚氣，扮演年紀輕的角色都完全無問題，話說佢入行15年至今，竟然飾演過14次弟弟角色！被譽為無綫的「 御用細佬 」！
黃嘉樂曾經講過，對於經常演年紀小的角色有點抗拒，甚至因為自己被定型而氣餒，不過幸好佢後來改變了心態，近年演出的角色都愈來愈多元化！希望嚟緊有更多機會俾黃嘉樂發揮啦！
將來還有什麼演唱會值得留意？
有不少歌手宣布舉辦演唱會，小編為你整合了2023香港演唱會+搶飛攻略一覽，包含各演唱會優先購票日期、公開售票日期、門票價錢、座位表等，想搶飛粉絲必定要留意！
