【獨家新相】 黎明新寵Wing Chan 行頭十級跳變闊太

最新娛聞

黎明離婚六年感情再有滋潤!早前本刊獨家爆出黎明去年開始寵幸失婚女助手Wing Chan,而本刊再度收到可靠消息,指阿Wing狗年報喜將榮升人母,現時已陀B六個月!呢日阿Wing大肚出巡shopping,睇完七人車又睇BB床,個人打扮都煥然一新,一身行頭加埋接近4萬元,榮升闊太!

撰文:東方新地|圖片:東方新地

黎明新寵Wing 曾撻著李治廷

又一個飛上枝頭的成功故事,原本寂寂無聞屋邨出身的唱片公司已婚女助手Wing Chan,13年撻著當時屬黎明旗下的李治廷,有傳佢跟出埠工作愈行愈埋,最終與老公離婚收場,後來與李治廷亦分手兼斷絕來往。

阿Wing個性熱情開朗,細細粒皮膚黝黑似迷你版樂基兒,在老闆黎明最心情低落時主動熱情出擊,上門陪伴又頻頻出海飲紅酒,旋即獲老闆黎明寵幸!據知阿Wing現時喺黎明旗下公司打晒骰,更進駐天王於上水雙魚河St.Andrews Place的6千呎獨立屋!

Wing陀B六個月

本刊收到可靠消息,指阿Wing不單成為黎明新寵,更會在狗年榮升人母,現時已懷孕六個月!日前本刊拍得阿Wing由黎明寓所出發去shopping,可見佢腹大便便但行竹動輕盈,且剪了一頭短髮。

睇中七人車

據知阿Wing已為生B作好準備,早前把頭髮剪短,以免搶去BB營養,看她精神不錯,腳骨力特好,行足幾個鐘頭街都未見要休息。入到商場,阿Wing第一時間行到車行,望住門口陳列價值約35萬的七人車「Noah」,佢睇得入神更用手機影低,車行經紀見佢一身名牌似足闊太,即落足嘴頭力Sell,除殷勤招呼上車試坐,又埋枱傾價錢同細節。

之後阿Wing拎住新車資料離開,還邊行邊研究。據知呢款車與黎明得力助手子泉駕駛的七人車同款,阿Wing為方便產後與B外出,亦想把現時駕駛的福士小房車換成七人車,與子泉睇齊。

再睇BB床

其後阿Wing再折返商場逛嬰兒家具店,主攻日本品牌的BB床及被具,見佢細心研究每張床的資料,最後睇中一張可延伸長度及與大人床拼接的BB 床,不過佢未有落訂購買,並向售貨員表示要與家人商量後先決定。

行頭十級跳變闊太

屋邨長大的阿Wing,本來只係一個女助手,衣著方面向來簡約。不過搖身一變成為黎明新寵後,行頭亦十級跳似足闊太,由頭到腳都係當季的名牌,富貴生活現晒形!

讀者留言