黎瑞恩演唱會 籌款買20部洗腎機

最新娛聞

本周接受訪問的嘉賓是小恩子黎瑞恩,演唱會舉行在即,她大談舉行個唱的原因,又剖白患病後心態上的轉變⋯⋯

撰文:東方新地
圖片:新傳媒圖片庫、黎瑞恩FB

黎瑞恩 演唱會有壓力

黎瑞恩將於4月舉行《感恩有你》演唱會,問到隔咗咁耐再開演唱會有冇壓力?佢話:「隔咗咁耐都有㗎,但壓力係開心嘅壓力,因為十六年前第一次做自己嘅演唱會,我覺得有啲位做得唔係幾好,諗住呢一世都應該做唔到嘞,留番下一世啦,但係今次又畀我有機會再做番,咁就梗係要畀心機做啦,要盡量做好啲畀觀眾睇,尤其係唱歌嘅部分,因為大家都係鍾意聽我唱歌。」至於演唱會準備成點?「之前做咗一連串宣傳,依家收埋自己減肥、練氣、練歌 ⋯⋯大家應該到4月先再見到我!」

講到演唱會係為腎臟基金會籌款買洗腎機,黎瑞恩表示:「係呀,我成日都覺得到咗我哋呢個年紀,做一啲嘢都要有意義啲,自己又開心、又幫到人,咁就最好!我諗住籌大概二十部,唔淨止我,我會叫其他朋友一齊捐,希望做到啦!」

超出性感底線

講到演唱會嘅歌衫,黎瑞恩預告會非常性感:「因為我從來都冇性感過,今次啲衫已經超出咗我性感嘅底線,但陳華國先生話『咁樣會好靚呀!』咁我梗係信佢啦,因為衫呢part佢負責㗎嘛,算啦,咁試吓啦!」問到佢會唔會為演唱會減磅?黎瑞恩話:「實我覺得去到我呢個年紀,係唔可以太瘦,因為如果太瘦啲皮就會墮落嚟,我會做一啲運動,同埋我只係減十零磅,十零磅已經好覺眼,覺得我好瘦㗎嘞!至於扮靚,我係比較懶惰,但係跟住落嚟我就會好勤力!」

提到投資林敏驄演唱會,黎瑞恩指:「林敏驄簡直係一個神話,見到佢成日條條揈,我問佢:『阿驄,你今年幾多歲呀?』佢話五十零,我話:『你有冇諗住喺你六十歲前做一啲轟轟烈烈嘅事,搞個作品展?』佢問:『邊個搞?你搞呀?』我口快快話:「好呀!』但我乜都唔識㗎嘛,之後搵咗間公司合作,但冇理由主辦單位係黎瑞恩㗎?咪開番間公司,咁間公司叫咩名呢?真係好感恩佢能夠開到演唱會,不如就叫『感恩製作』。好開心,最後都成功!」

冇理體內腫瘤

去年尾黎瑞恩成功切除腹部腫瘤,問到佢依家個腫瘤情況點?佢話:「我都唔知,因為我都冇檢查過,我冇諗住再理佢。當初發現係良性,但醫生話冇藥食㗎,冇得醫㗎,除非切咗佢,但如果我切腫瘤,我可能要切埋我其他器官嘅一部分,所以我話唔切嘞,由佢啦,醫生就話你最緊要開心,唔開心會令到佢發大或者惡化。我話咁得嘞,我會開心啲嘞!」

至於患病後心態上嘅改變,黎瑞恩話:「就係唔好諗埋晒啲無謂嘢,有時有啲嘢放開啲,冇嘢嘅!咪又係要咁過,日子都係要咁過㗎啦,做咩要唔開心咁過呢?我梗係開心咁過啦!」

讀者留言