mirror五周年團歌大玩角色扮演

MIRROR五周年團歌大玩角色扮演 搞鬼角色超有歡樂氣氛

最新娛聞

廣告

11月3日將會是MIRROR成軍五周年的大日子!除了連串活動外,12子亦推出了新歌《Catch a Vibe》來慶祝一番。MV中除了靚仔造型,人人更有搞鬼角色,歡樂氣氛滿瀉!隨著五周年的來臨,MIRROR亦談及他們所期待的突破,還分享了對Fans的心底話。

mirror五周年團歌大玩角色扮演
(圖片來源:IG@mirror.weare)

聚首一堂感情不變

成團五年,MIRROR各人愈來愈忙,很少機會走在一起,但今次《Catch a Vibe》卻讓大家再次眾首一堂,分享歡樂,而歌詞亦道出了他們的心聲,填詞人陳詠謙道:「成班人相處模式唔同咗,少見咗好多,但有一啲感覺、情誼,如果存在喺心裡面,並唔會因為少見咗而冇咗。唔好覺得係理所當然,就如歌曲裡面所講,如果得閒有時間,就約出嚟見下,傾下偈。」就如作曲的T-Ma,在副歌裡埋下的一句Hook「Catch a Vibe」的深層意義,最重要就是抓緊歡聚的一刻,從中重拾力量。

mirror五周年團歌大玩角色扮演
(圖片來源:大會提供)

成員以搞鬼造型登場

今次MIRROR在《Catch a Vibe》的MV 中,除了有預告及單曲封面的華麗型格造型外,12人都有不同的角色扮演,發放笑彈。Stanley道:「今次大玩唔同時空,大家唔同背景、服飾、顏色,都幾得意。」12子分成四組,其中姜濤扮演看更,看守蠟像館內的展品,當中包括Stanley與Jeremy這兩個蠟像。AK則走入80年代電視Game Show中擔任主持人,以復古的造型、浮誇的演繹,與參賽者Frankie、Jer及Tiger大玩搶答遊戲。Anson Lo飾演𢦀直,但精神有問題的科學家,與大懵、好似化學老師冇乜記性的科學家Ian,則捉了剛好落街買餸的年青人Edan去做實驗。至於IT Look的Alton,實情是個速遞員,而他搬運的貨物,就是Lokman!這個完全不按常理出牌的人設與故事背景,充滿喜感,眾人也投入當中,即興演出,娛己娛人。Jer道:「今次無論隻舞、個Beat、場景裡面要做嘅戲,大家都可以好Free Flow去做,好玩!」Tiger亦說:「因為首歌開心,劇情又開心,做嘅時候就輕鬆啲。」姜濤直情輕鬆得捉實Stanley,玩到扮豬嘴,但他搞笑說:「呢啲係我平時嘅日常嚟嘅,不過從此以後會有啲唔一樣,除咗工作以外,非必要嘅話都唔會同Stanley溝通。」但Stanley聽到後仍很有愛地表明:「佢唔當我係好朋友都冇問題,我仍然會當佢係我嘅好朋友。」至於扮演貨物的Lokman要在1.2米高的箱裡面做Freeze動作,算是較認真的Shot,不過Lokman同樣覺得好玩,並說:「挑戰下自己嘅極限都幾正。」

mirror五周年團歌大玩角色扮演
(圖片來源:大會提供)

成員們對未來的願景

來到五週年,除了推出新歌《Catch a Vibe》,各人都希望團隊上有新的突破,且聽聽他們的想法:

Jer:今次喺跳唱歌上試咗新嘅音樂元素,希望可以再試多啲,同埋可以去世界各地做下表演,俾其他海外Fans睇到MIRROR開Show係點樣。

mirror五周年團歌大玩角色扮演
(圖片來源:大會提供)

Edan:如果可以去到其他地方,一方面海外Fans終於可以親眼睇到我哋嘅演出,二來又好似旅行,去下其他地方都幾開心。

mirror五周年團歌大玩角色扮演
(圖片來源:大會提供)

姜濤:開海外嘅演唱會啦!大家都未試過。

mirror五周年團歌大玩角色扮演
(圖片來源:大會提供)

Alton:啱啱12個齊人搭飛機做綜藝,希望以後多啲呢啲機會,嚟緊1月香港開Show,當然希望日後都有海外演出嘅機會,但呢啲就係天時地利人和喇!

mirror五周年團歌大玩角色扮演
(圖片來源:大會提供)

Stanley:開返關去唔同地方見下唔同Fans,就算唔係開演唱會,只係Fans Meeting都好。

mirror五周年團歌大玩角色扮演
(圖片來源:大會提供)

Tiger:可以12個一齊做下舞台劇,大家都冇試過,呢件事應該好突破。

mirror五周年團歌大玩角色扮演
(圖片來源:大會提供)

Anson Lo:我哋12個人都未試過一齊做舞台劇,一齊做Musical,應該會好玩。

mirror五周年團歌大玩角色扮演
(圖片來源:大會提供)

Frankie:都希望我哋唔淨係限於喺舞台上嘅團隊合作,不過今年其實都試咗好多,例如電影《12怪盜》同埋團綜《MIRROR Time》。

mirror五周年團歌大玩角色扮演
(圖片來源:大會提供)

AK:之前都有唔同隊員出Solo,嚟緊其他隊員都可以出到自己嘅Solo,或者做一啲佢哋喺MIRROR裡面嘅時候,大家睇唔到嘅強項。

mirror五周年團歌大玩角色扮演
(圖片來源:大會提供)

Lokman:我哋成日被人標籤係一隊男團,可以做啲反傳統嘅嘢,例如我哋成日做好正能量、繽紛嘅歌,可以試做啲好惡嘅歌,或者係聲嘶力竭、慘情嘅歌,對我哋嚟講都會多一種感覺。

mirror五周年團歌大玩角色扮演
(圖片來源:大會提供)

Jeremy:開抬外國市場,而家啱啱開始,要繼續努力。

mirror五周年團歌大玩角色扮演
(圖片來源:大會提供)

Ian:希望MIRROR啲Crew飯好食啲,膳食可以有突破。

mirror五周年團歌大玩角色扮演
(圖片來源:大會提供)

五週年與fans的心底話

在這五年裡,MIRROR與Fans都一同成長,各成員都想跟Fans分享他們的心底話:

Jer:好多謝每位Fans,由比賽開始我哋只係Nobody嘅時候就一直支持到而家,好多謝大家嘅陪伴,我哋先有力量去做更多作品俾大家。

mirror五周年團歌大玩角色扮演
(圖片來源:大會提供)

Tiger:都唔明白點解會有人喜歡我哋呢12個人,真係沿途高低伴我走過,好多粉絲朋友都係不離不棄,令到我哋有機會同能力喺呢個行業行落去。

mirror五周年團歌大玩角色扮演
(圖片來源:大會提供)

AK:多謝Fans五年嚟嘅支持同埋愛,冇你哋,我哋冇可能行到嚟呢一步,希望嚟緊日子大家可以用一個最舒服嘅心,最開心嘅狀態去追你哋嘅星啦!

mirror五周年團歌大玩角色扮演
(圖片來源:大會提供)

Frankie:多謝Fans嘅包容,同埋無條件付出嘅愛,亦多謝一路以嚟同我哋講過唔好說話嘅Fans或者Haters,呢啲會令我哋反醒,Keep住改進。

mirror五周年團歌大玩角色扮演
(圖片來源:大會提供)

Jeremy:堅持係好難,但Fans到而家都一路咁支持我哋,都真係好鍾意我哋先做到,所以真係好多謝大家。

mirror五周年團歌大玩角色扮演
(圖片來源:大會提供)

Stanley:呢啲嘢唔能夠用說話講,只能夠好俾心機做每一個作品,好努力去報答佢哋。

mirror五周年團歌大玩角色扮演
(圖片來源:大會提供)

姜濤:用作品說話。

mirror五周年團歌大玩角色扮演
(圖片來源:大會提供)

Ian:除咗感激都係感激,成日都覺得如果冇大家嘅支持,都冇而家嘅我哋,做好多嘢都冇人同我哋分享,冇咗嗰個意義。

mirror五周年團歌大玩角色扮演
(圖片來源:大會提供)

Edan:五年喇!都絕對唔係三分鐘熱度,大家都真係好有愛,先可以支持我哋咁耐,希望我哋可以回饋返你哋,繼續努力。

mirror五周年團歌大玩角色扮演
(圖片來源:大會提供)

Anson Lo:呢五年有新Fans亦有一直支持嘅舊Fans,每位都同樣重要,呢五、六年好似坐過山車有開心唔開心,但大家依然默默守候,呢樣係每一日都好感謝。

mirror五周年團歌大玩角色扮演
(圖片來源:大會提供)

Alton:MIRROR嘅存在,都因為Fans同埋普羅大眾有份參與呢件事,先至有呢個位置,衷心向每一位講聲多謝,希望以後多啲輸出,做多啲唔同作品俾大家睇。

mirror五周年團歌大玩角色扮演
(圖片來源:大會提供)

Lokman:同大家距離遠咗,對Fans有少少虧欠,我哋直接表達俾大家嘅愛又間接咗,初出道會多少少影相、傾偈嘅機會,可以望住大家眼睛交流,而家只可以喺舞台透過能量發送,多謝大家嘅體諒,喺咁嘅情況下仍然無私愛我哋。

mirror五周年團歌大玩角色扮演
(圖片來源:大會提供)

MIRROR〈Catch a Vibe〉MV現已於Mirror YouTube Channel推出。

Mirror YouTube Channel -https://www.youtube.com/c/MIRRORweare/

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!

撰文:東方新地圖片來源:大會提供