MIRROR ACE｜Edan遭小學生連環派檸檬 AK化身跑腿幫阿媽追星搶心

呂爵安以為憑《膠戰》入屋 慘遭學生連環反白眼

昨日播出的首集《MIRROR ACE》安排成員在20分鐘內俘虜學童歡心。「藍組」的呂爵安（Edan）賽前自信爆棚，除了對隊友陳卓賢（Ian）極具信心外，更得戚表示自己擁有主場之利：「我對自己都好有信心，知唔知點解？因為啲小朋友好多都有睇《膠戰》！」誰知一落場卻瘋狂「食檸檬」！Edan向三位小女孩索取心心，其中兩位毫不留情直說「唔可以」；他隨後轉陣問另一位女同學可否猜包剪揼決定，竟被對方老積地秒拒：「我唔會博㗎！」慘食檸檬的Edan無奈到當場反白眼，場面極度惹笑！幸好他腦筋急轉彎，轉攻教職員，憑著與老師自拍加親筆簽名，成功在老師手上取得珍貴的「黃金之心」，帶領藍組在積分榜遙遙領先。

江𤒹生遇女生代母親追星 與Edan爆笑搶客戰

另一邊廂，「橙組」的Anson Kong（AK）則遇上超搞笑的「代母追星」奇遇。AK原本主動出擊向一名小女孩打招呼：「我叫AK，你好！」怎料女同學竟直白回應：「媽媽派我嚟搵Edan！」轉數極快的AK立刻化身跑腿兼順勢拉票：「拿，我幫你去搵Edan，你畀個心心我好冇？我帶你去搵佢，完成媽媽任務好緊要呀！」當AK成功帶女同學找到Edan時，兩兄弟即場爆發搶客戰！Edan見狀立刻要脅：「咁你要畀心心我喎！咁我唔幫你嘞，你畀心心我就幫你！」眼見場面僵持，AK唯有打圓場提議：「猜包剪揼啦！」結果Edan猜贏，但依然十分識做，幫小女孩簽名完成媽咪的願望。為了贏得更多小朋友的心，AK其後更搏到盡表演做拱橋，可惜挑戰「一字馬」失敗慘變「八字馬」，只能以搞笑攻勢求小朋友畀心心。

大談出道突破時刻 難忘激咀Anson Lo

除了綜藝感十足的搶客戰，兩位成員亦在節目中分享了出道以來的突破時刻。Edan坦言演戲為他帶來很大改變：「若拍劇嚟講呢，我覺得《大叔的愛》都好突破嘅，同埋係好好嘅體驗同經驗。」至於AK同樣認為拍劇是他的突破moment，更因此解鎖了多項運動技能：「拍劇可以學到好多唔同嘅新技能，去打Ice Hockey呀，之前《打天下》嘅空手道呀，或者成個Boxing都係。每次拍劇一樣嘢都可以學個新技能，我覺得係一個好大突破。」

網民大讚節目效果十足 留言力撐偶像真性情

節目播出後隨即引爆廣泛討論，大批觀眾對兩位偶像放下身段落力拉票感到相當驚喜。不少粉絲在社交平台上湧入留言，紛紛表示「見到佢哋食檸檬真係好搞笑」、「為了幫阿媽追星真係辛苦晒」，讚賞他們面對突發狀況時展現出極高情商。同時亦有網民特別留意到兩人在校園內毫無架子，與學童互動時流露出親切自然一面，並留言指「小朋友反應最誠實」。