沿路幫緊你｜潔癖男化身「特攝英雄」求婚娟姐助攻送驚喜反彈變喊包

《沿路幫緊你》策劃砸毀模型大整蠱

平時最怕搞大龍鳳、自認無乜「儀式感」的練美娟（娟姐），今次接到飲食頻道KOL阿保與Matthew的特別委託，竟然感動到親自出馬！原來兩人的好兄弟兼御用攝影師潮彤，一直心思思想同拍拖兩年的女友Ash求婚，點知早前去旅行竟然被女友「截糊」搶先求婚！為咗幫兄弟爭番口氣，阿保同Matthew決定聯同節目組，為「未來阿嫂」炮製一場畢生難忘的驚喜求婚！

測試準新郎EQ！扑爆過萬珍藏Figure

要抱得美人歸，當然要經過重重考驗！潮彤出名是個超級玩具狂熱份子兼有嚴重潔癖，為咗測試佢面對突發危機的EQ，娟姐同兩位好兄弟決定直踩上潮彤的玩具Studio，上演一幕「打爛珍藏」的大整蠱！眾人特意買來一個二手Figure偷龍轉鳳，趁潮彤行開時狠心扑爆玻璃兼將Figure分屍！當潮彤趕到「案發現場」，見到滿地玻璃碎同娟姐自責爆喊的逼真演技，內心雖然滴血，但竟然強忍心痛，反過來安慰大家：「人無事最緊要！玩具無事第二緊要！」呢份超高EQ加大方，連娟姐都大讚過關，證明未來阿嫂絕對無揀錯老公！

星級武指特訓！化身「特攝英雄」打怪獸

為象徵潮彤由「睇特攝片的男仔」正式蛻變成「守護老婆的男人」，兄弟團決定陪他癲一次，親自落場拍攝一套特攝英雄片作為求婚大禮！節目組更重本請來專業電影武指團隊，對三男進行地獄式魔鬼特訓。平時揸慣機的潮彤同兩位兄弟，為咗個短短幾分鐘的鏡頭，由天光打到天黑，著住焗促的戰隊戲服瘋狂吊威吔、打筋斗兼硬食撻落墊。雖然三人大叫全身骨痛兼「救命」，但為咗兄弟的終身大事，全部頂硬上，呢份男人的浪漫真係隔住個Mon都覺得熱血！

淚崩求婚一刻假Fans Meeting真求婚！

戲肉終於來到！兄弟團夾計搞咗場「假Fans Meeting」，暗中請來潮彤同阿嫂的親朋戚友埋伏。大會突然播出潮彤大戰怪獸的《終劇篇》特攝片，當全場睇到嘩嘩聲之際，潮彤終於現身！平時內斂的潮彤，在眾人見證下對住阿嫂深情剖白：「多謝你一直包容我、接受我嘅麻煩……我人生嘅路想同你一齊行，只想同你一個！」知道女友是「姜糖」，大會特意安排現場歌手與潮彤獻唱姜濤的首本名曲《蒙著嘴說愛你》助攻出場，女友感動到眼泛淚光，大聲Say Yes！呢場有笑有淚、由好兄弟一手包辦的求婚大作戰大成功，恭喜潮彤正式變身做「人夫戰士」，以後個世界就交畀你守護啦！