公司有火警演習 阿頭竟然話要同事繼續做嘢「總要有人燒死！」
廣告
返學返工不時都會遇上走火警，事關臨近秋天天氣乾燥易有火災，咁學校﹑公司都希望同學﹑同事都有返啲危機意識，呢日有人在網上分享，話公司出晒email話要大家走火警，點知部門主管竟然唔理公司安排，仲語出驚人話，火災總要有人燒死…到底一個人要有幾癲先講得出咁嘅說話兼阻止同事預習火警呢？
撰文：東方新地｜圖片：facebook﹑電視劇截圖
有網民分享自身經歷，網上facebook專頁「奴工處」開post就話，當事人間公司原本安排了火警演習，公司admin部已經向全體員工send email，話大家必須參與演習
當日到了演習時間，連火警鐘都響埋，但係當事人個上司竟然無咩反應，仲話佢哋條team比較多嘢做，叫大家唔好出去演習啦！
就喺呢個時候，就算打工仔奴性有幾重，都要爆喇！！
有同事就反駁admin係叫全公司全部員工都要參加㗎喎，解釋返其實呢個係公司規定。
咁其實意外呢啲嘢係意料之外，既然公司有以上安排，主管又有咩權力阻止同事去參加演習呢？況且，演習用嘅少少時間，唔通同事真係為咗偷懶去同你爭吵咩？
點知呀主管竟然「一言驚醒洛克人」，呢位阿頭話：「總有啲人要留低畀人燒死，我哋演習呢部分就得」，言下之意即是一場火災，總要有人做犧牲者？佢哋演習呢部分就可以？？？
當事人話當時全場啞咗繼續做嘢…
網民睇到呢個post都覺得好無奈，都唔知好嬲定好笑…
有網友就話：「生係公司嘅人，死係公司嘅鬼」、「你不入地獄誰入地獄」「將奴性發揮到極致」，又有人話不如淨係留低個阿頭算啦！
