拍拖呢回事，小編真係識條鐵咩， 港男 嫌棄港女、港女又嫌棄港男，呢類話題真係講到2046都未完！去年Facebook專頁「ChiSin」上載一條短片，片中有多個女友無理取鬧的情境，而片中男主角就教你如何霸氣地對付呢類無理取鬧的女朋友，學嘢啦巴打們！
模型篇
男人的浪漫，女朋友實在好難理解。情境一入面男友砌緊模型，點知女友唔識分高達同機動警察都算啦，仲竟然話係「爛鬼玩具」，呢個moment男友要爆啦！
「收嗲啦八婆！」如果女友眼中每隻模型都一樣，咁男友眼中女友每枝唇膏其實都一樣，唔通搽完就真係變韓妹變日本妹咩！
考眼力篇
「你覺得我今日有咩唔同啊？」情境二的男友聽到呢個問題如臨大敵，呢個時候唯有靠估：「眉毛畫粗咗？」「今日瘦咗？」「粉底唔同咗？」通通都錯！原來係修咗腳皮啊！咁樣都留意唔到，又要俾人鬧！
男友又要爆啦！成日問呢啲問題，講真識答其實係Bonus，但答錯又要俾人鬧，片中男友講得妙：「你估個個都係金田一啊！」如果真係金田一，佢身邊應該成日好多人死……
IG女神篇
Facebook、IG等社交平台，經常會成為情侶間發生爭執的導火線，相信唔少朋友都身同感受… 情境三入面女友發現男友follow「IG女神」，於是大興問罪之師，話「你咁鍾意睇咪媾佢囉！死狗公死狗公……」
睇吓男友點反擊！佢就話自己所有wallpaper都已經係兩人的合照，IG又全部都係兩人的相片，咁都唔滿意！之後再反咬一口：「你夠成日睇樂仔啦！唔通鍾意睇就媾到樂仔咩！」
