餐廳

盤點8大風光一時嘅餐廳 巴打:質素簡直跳樓式下降

熱話

廣告

點解有啲餐廳一開大家就即刻排長龍去食?咪就係因為有啲舖頭嘅食物質素未必保持到水準囉!近日有巴打一人一票嚴選曾經大受歡迎、但依家已經冇乜人去嘅餐廳,當中又有冇你曾經好鍾意幫襯嘅舖頭呢?

撰文:占士 │圖片來源:連登仙跡岩Wendy’s、Facebook、Youtube、新假期周刊、加太賀日式料理Krispy Kreme|編輯:占士

網民一人一票 嚴選過氣餐廳

既然要開poll一人一票嚴選已經唔再熱門嘅餐廳,樓主當然要拋磚引玉,講個一眾巴絲都認同嘅案例啦,就係許留山!

那些年人氣餐廳變隱世餐廳

台式飲料店仙跡岩勾起集體回憶

巴打們提到嘅餐廳有啲仍然屹立不倒,但有啲早已經執笠,或者分店少到好難搵到,簡直好似變咗隱世餐廳咁!

1. 仙跡岩

曾經喺香港開到成行成市嘅仙跡岩,以首間將台式飲料引入香港作為招牌,但可惜現已風光不再,成為好多80後、90後嘅集體回憶。但唔好以為仙跡岩已經絕跡香港呀,其實佢哋仲有四間分店喺香港,包括:新蒲崗店、佐敦店、西環店以及葵興食堂店。

2. 扒王之王

扒王之王全盛時期有成三十幾間分店,不過現時只係得返位於沙田娛樂城嘅分店。有網民懷疑扒王之王之所以會衰落,好有可能係因為同「巴士阿叔」事件有關,仲有報道指呢件事仲搞到扒王之王嘅老闆娘、息影女星林珍奇於2006年憤而服食安眠藥企圖自殺。

3. Wendy’s

Wendy’s 亦曾兩度進軍香港。首次於80年代就進駐香港,憑住可愛嘅孖妹商標而名為「得意妹」,撤出後於90年代初轉以Wendy’s之名重返香港市場,獨特嘅方形漢堡牛肉同原個焗薯受到香港人熱捧,曾設立十多間分店。不過,於2003又再一次撤出香港。

 

4. 哈迪斯

美式快餐連鎖店哈迪斯於90年代開始進駐香港,曾於香港設25間分店,但同樣因經營不善問題而導致06年底撒出香港。不少90後朋友視佢為集體回憶,甚至於去年的愚人節受惡搞,於網上流傳哈迪斯於即年回歸嘅消息!哈迪斯經典嘅西部牛仔飯(肉醬飯)、兩件雞配汽水嘅套餐一定喚起返唔少人嘅回憶!

5. 出奇老鼠

「薄餅樂園開心地,出奇老鼠錫晒你!」一講起呢句,唔少80後即刻不自覺認頭:「我有去玩過呀!」,呢句來自美國嘅兒童樂園加快餐店-出奇老鼠嘅經典廣告口號,當時可謂無人不曉!於80年代初於香港開業,主要經營室內遊樂場同快餐薄餅店,有得食、有得玩,簡直係小朋友嘅天堂呀!可惜,佢於89年就結業,撒出香港。

6. Krispy Kreme

呢間美式冬甩連鎖店於2006年進駐香港,人氣一時無兩,不過可惜呢間冬甩店於2008年亦難抵金融海嘯,本港分店都被逼全線結業。如果大家仲想食到Krispy Kreme嘅冬甩,近近哋都要飛到台灣或者日本先食到。

7. 味千拉麵

味千拉麵曾經係無數香港人追捧嘅人氣日式拉麵店,但近年日式拉麵店已經開到一街都係,間間標榜正宗口味,味千已經再唔係好似剛剛開業咁獨特。不過無論大家點睇都好,味千拉麵喺香港仲有數十間分店,內地更開超過700間分店,至今仍然屹立不倒。

8.加太賀日式料理

香港早年日式料理店唔多,其中一間能夠成功彈起嘅就係加太賀日式料理店,據知當年紅磡祟成條街遠睇全部都係紅燈籠,加太賀加加埋埋租咗四個鋪位,非常旺場。

關鍵詞
連登